മലപ്പുറo: വാരിയംകുന്നത്ത് കുഞ്ഞഹമ്മദ് ഹാജിയുടെ പേരില് മാത്രമല്ല. മലബാറിലെ ധീര ദേശാഭിമാനികളുടെ ചരിത്രം മായാതെ സൂക്ഷിക്കാന് ഇനിയും ഒരുപാട് സ്മാരകങ്ങള് ഉയരുമെന്ന് പെരിന്തല്മണ്ണ എം.എല്.എ നജീബ് കാന്തപുരം.
മലപ്പുറത്ത് വാരിയംകുന്നന് സ്മാരകം പണിതാല് ലോകത്തുള്ള ഹിന്ദുക്കളെല്ലാം അത് പൊളിക്കാന് രംഗത്തെത്തുമെന്ന് ഹിന്ദു ഐക്യവേദി നേതാവ് കെ.പി. ശശികല കഴിഞ്ഞ ദിവസം പ്രസംഗിച്ചിരുന്നു. മുസ്ലിം ലീഗ് നേതാക്കളായ പാണക്കാട് തങ്ങന്മാര്ക്കെതിരെയും ശശികല രൂക്ഷ പ്രതികരണങ്ങള് ഉന്നയിച്ചിരുന്നു. ഇതിന് പിന്നാലെയാണ് മറുപടിയുമായി നജീബ് കാന്തപുരം എത്തിയത്. ഫേസ്ബുക്കിലാണ് അദ്ദേഹം കുറിപ്പ് പങ്കുവെച്ചത്.
കുറിപ്പില്നിന്ന്:
വാരിയംകുന്നത്ത് കുഞ്ഞഹമ്മദ് ഹാജിയുടെ പേരില് മാത്രമല്ല. മലബാറിലെ ധീര ദേശാഭിമാനികളുടെ ചരിത്രം മായാതെ സൂക്ഷിക്കാന് ഇനിയും ഒരുപാട് സ്മാരകങ്ങള് ഉയരും. അതിലൊന്ന് എന്റെ മണ്ഡലത്തില് തന്നെ പണിയും. വാഗണ് കൂട്ടക്കൊലയില് കൊലചെയ്യപ്പെട്ട ഏറ്റവും കൂടുതല് രക്തസാക്ഷികളുള്ളത് പെരിന്തല്മണ്ണയിലെ കുരുവമ്പലത്താണ്. ആ മണ്ണില് അവരുടെ ഓര്മ്മകള് മായാതെ സൂക്ഷിക്കാന് ഒരു ചരിത്ര മ്യൂസിയം അടുത്ത വര്ഷത്തെ എം.എല്.എ ഫണ്ട് ഉപയോഗിച്ച് നിര്മ്മിക്കാന് തീരുമാനിച്ചിട്ടുണ്ട്.ഇത് ഇപ്പോഴുണ്ടായ തീരുമാനമല്ല. കഴിഞ്ഞ സ്വാതന്ത്ര്യദിനാഘോഷ പരിപാടിയില് പെരിന്തല്മണ്ണയില് പൊതുജനങ്ങള്ക്ക് മുമ്ബില് പ്രഖ്യാപിച്ചതാണ്. ഒന്ന് ഓര്മ്മിപ്പിച്ചു എന്നേ ഉള്ളൂ..
