കോഴിക്കോട്: മലയാള മനോരമ ദിനപത്രം നൽകിയ വ്യാജ വാർത്തയ്ക്കെതിരെ പി എ മുഹമ്മദ് റിയാസ് എംഎൽഎ നിയമ നടപടി ആരംഭിച്ചു. സി.എം.ആർ.എൽ-ൽ വീണയ്ക്ക് സേവനത്തിനായി ലഭിച്ച പണം മുഹമ്മദ് റിയാസിന്റെ അക്കൗണ്ട് വഴി പലരുടെയും അക്കൗണ്ടുകളിലേക്ക് കൈമാറ്റം ചെയ്തുവെന്നും ഇതുമായി ബന്ധപ്പെട്ട് രണ്ടുതവണ ഇ.ഡി. റിയാസിനോട് ഫോണിൽ വിശദീകരണം ചോദിച്ചുവെന്നുമുള്ള വാർത്ത കെട്ടിച്ചമച്ചതാണെന്ന് കാണിച്ചാണ് നോട്ടീസ്. അഡ്വ. മുനീർ അഹമ്മദാണ് മുഹമ്മദ് റിയാസിനുവേണ്ടി ലീഗൽ നോട്ടീസ് അയച്ചത്.
മലയാള മനോരമ വാർത്ത പച്ചക്കള്ളമാണെന്നും എന്റെ ഫോട്ടോ വെച്ച് പ്രസിദ്ധീകരിച്ച ഈ അസംബന്ധ വാർത്തയ്ക്കെതിരെ നിയമനടപടി സ്വീകരിക്കുമെന്നും മുഹമ്മദ് റിയാസ് നേരത്തെ തന്നെ വ്യക്തമാക്കിയിരുന്നു. മലയാള മനോരമ ദിനപത്രത്തിന്റെ ഒന്നാം പേജിൽ ഫോട്ടോ സഹിതം പ്രസിദ്ധീകരിച്ച വാർത്തയെ ‘അസംബന്ധം’ എന്നാണ് അദ്ദേഹം വിശേഷിപ്പിച്ചത്. ഒരു തെറ്റും ചെയ്തിട്ടില്ലാത്തതിനാൽ പൂർണ്ണ ആത്മവിശ്വാസമുണ്ടെന്നും കാര്യങ്ങളെ നിയമപരമായി തന്നെ നേരിടാൻ സാധിക്കുമെന്ന ബോധ്യമുണ്ടെന്നും റിയാസ് വ്യക്തമാക്കി.
