കൊച്ചി : സംസ്ഥാന സർക്കാരിന്റെ ആദ്യ ബജറ്റിൽ സിനിമയെ വ്യവസായമായി പ്രഖ്യാപിച്ച തീരുമാനത്തെ സ്വാഗതം ചെയ്ത് നടൻ മോഹൻലാൽ രംഗത്ത്. സർക്കാരിന്റെ പ്രഖ്യാപനത്തിന് അഭിനന്ദനം അറിയിച്ച് മോഹൻലാൽ ഫേസ്ബുക്കിൽ കുറിപ്പ് പങ്കുവെച്ചു. പുതിയ ബജറ്റിലൂടെ സിനിമയെ വ്യവസായമായി അംഗീകരിച്ച കേരള സർക്കാരിന്റെ തീരുമാനം ഏറെ സന്തോഷത്തോടെയാണ് സ്വീകരിക്കുന്നതെന്ന് അദ്ദേഹം വ്യക്തമാക്കി. ഈ നടപടി സിനിമാമേഖലയ്ക്ക് പുതിയ ഉണർവും വളർച്ചയും നൽകുമെന്നും മേഖലയിലെ വികസനത്തിന് ശക്തമായ അടിത്തറയാകുമെന്നും മോഹൻലാൽ അഭിപ്രായപ്പെട്ടു. സിനിമാ മേഖലയുമായി ബന്ധപ്പെട്ട് പ്രവർത്തിക്കുന്ന ആയിരക്കണക്കിന് തൊഴിലാളികൾക്കും കലാകാരന്മാർക്കും സാങ്കേതിക പ്രവർത്തകർക്കും ഈ പ്രഖ്യാപനം പുതിയ പ്രതീക്ഷകളും കൂടുതൽ അവസരങ്ങളും സൃഷ്ടിക്കുമെന്ന് അദ്ദേഹം പറഞ്ഞു.
അതേസമയം ഈ സുപ്രധാന തീരുമാനം കൈക്കൊണ്ടതിന് മുഖ്യമന്ത്രി വി.ഡി സതീശൻ, സാംസ്കാരിക വകുപ്പ് മന്ത്രി പി.സി വിഷ്ണുനാഥ് എന്നിവർക്കും മോഹൻലാൽ നന്ദി രേഖപ്പെടുത്തി. സിനിമാ മേഖലയെ കൂടുതൽ ശക്തിപ്പെടുത്താനും വ്യവസായിക തലത്തിലേക്ക് ഉയർത്താനും സഹായിക്കുന്ന ചരിത്രപരമായ നടപടിയായാണ് ഈ പ്രഖ്യാപനത്തെ അദ്ദേഹം വിശേഷിപ്പിച്ചത്. ധനകാര്യ വകുപ്പിന്റെ ചുമതലയുള്ള മുഖ്യമന്ത്രി വി.ഡി. സതീശൻ നിയമസഭയിൽ അവതരിപ്പിച്ച ബജറ്റിൽ സിനിമ, സംഗീതം, ശാസ്ത്രീയ ഗവേഷണം, തുടങ്ങിയ മേഖലകൾക്ക് പ്രത്യേക പ്രാധാന്യം നൽകി നിരവധി പദ്ധതികളാണ് പ്രഖ്യാപിച്ചിരിക്കുന്നത്.
