കോതമംഗലം : സ്വര്‍ണാഭരണക്കട നടത്തുന്ന ഇടുക്കി സ്വദേശിയുടെ കാര്‍ തടഞ്ഞ് തോക്കുചൂണ്ടി ഭീഷണിപ്പെടുത്തി പണം അപഹരിക്കാന്‍ ശ്രമിച്ച കേസില്‍ രണ്ടുപേര്‍കൂടി കോതമംഗലം പോലീസി‍ന്റെ പിടിയില്‍. അങ്കമാലി എടത്തോടുഭാഗത്ത് തളിയപ്പുറം വീട്ടില്‍ സജിത്ത് (34), വരാപ്പുഴ ശാന്തിനഗര്‍ ചുവന്നാരുംപാടത്ത് വീട്ടില്‍ അഭിലാഷ് (34) എന്നിവരാണ് അറസ്റ്റിലായത്.
മറ്റ് പ്രതികളായ വടുതല പുന്നക്കാട്ടുശ്ശേരി കണ്ടെയ്നര്‍ സാബു എന്ന സാബു, ചക്കരപ്പറമ്പ് പുല്‍പറമ്പ് റോഡില്‍ പുറക്കാട്ടില്‍ വീട്ടില്‍ തംസ് എന്ന നിധിന്‍ ആന്റണി, ചേരാനല്ലൂര്‍ ചിറ്റൂര്‍ ഹോളി ഫാമിലി ചര്‍ച്ച്‌ ഭാഗത്തെ പള്ളിക്കവീട്ടില്‍ ആന്റണി റിജോയ്, വരാപ്പുഴ പാലക്കാപറമ്പില്‍ വീട്ടില്‍ ജെറി ജോസ്, ഇടുക്കി രാജകുമാരി കൊല്ലാര്‍മാലില്‍ വീട്ടില്‍ എല്‍ദോ മാത്യു എന്നിവരെ നേരത്തെ പിടികൂടിയിരുന്നു.
ഫെബ്രുവരി ഒന്നിന് ഇടുക്കി രാജാക്കാട് സ്വര്‍ണാഭരണക്കട നടത്തുന്ന ബെഷി കാറില്‍ തൃശൂരിലേക്ക് പോകുംവഴി തങ്കളം മാര്‍ ബസേലിയോസ് ഡെന്റല്‍ കോളജിന് സമീപം പ്രതികള്‍ കാറിന് വട്ടംവെച്ച്‌ തോക്കുചൂണ്ടി ഭീഷണിപ്പെടുത്തുകയായിരുന്നു. പണവുമായാണ് ബെഷി സഞ്ചരിക്കുന്നതെന്ന വിവരമറിഞ്ഞ് തട്ടിയെടുക്കാനായിരുന്നു ശ്രമം.
