മൂവാറ്റുപുഴ : പട്ടാപ്പകല് ചായ കുടിക്കാനെന്ന വ്യാജേന എത്തിയ രണ്ടംഗ സംഘം ചായക്കടയില് നിന്ന് പണം കവര്ന്നു. ഇന്നലെ ഉച്ചക്ക് 1.30ഓടെ മേക്കടമ്പില് പ്രവര്ത്തിക്കുന്ന ഹോട്ടല് രാമകൃഷ്ണയിലാണ് സംഭവം. കെ.എല്-32 ഡി. 8592 നമ്പര് ഓട്ടോയില് എത്തിയ രണ്ടുപേര് ചായ ചോദിച്ച് കടയില് കയറിയശേഷം കാഷ് സൂക്ഷിക്കുന്ന പെട്ടിയില് നിന്ന് ബാഗെടുത്ത് കടന്നു കളയാന് ശ്രമിക്കുകയായിരുന്നു.
സംഭവം കണ്ട കട ഉടമയുടെ ഭാര്യ ഇവരെ തടയാന് ശ്രമിച്ചെങ്കിലും ഇവരെ അടിച്ചുവീഴ്ത്തി സംഘം ഓട്ടോയിലേക്ക് ഓടിക്കയറി. ഇതിനിടെ ബഹളം കേട്ട് എത്തിയ കടയുടമ ശെല്വന് ഇവരെ പിടികൂടാന് ശ്രമിച്ചെങ്കിലും ഇയാളെ ചവിട്ടിവീഴ്ത്തി സംഘം കടന്നു കളഞ്ഞു. ബാഗില് 7500 രൂപയും കുറെ ചില്ലറയുമാണ് ഉണ്ടായിരുന്നത്. മൂവാറ്റുപുഴ പോലീസില് പരാതി നല്കി.
