തിരുവനന്തപുരം: മങ്കിപോക്സ് ഭീഷണിയെത്തുടര്ന്ന് വിമാനത്താവളങ്ങളിലും ജാഗ്രത. രോഗലക്ഷണങ്ങളുള്ള രാജ്യാന്തരയാത്രക്കാര് ഉടന്തന്നെ സര്ക്കാര് ആശുപത്രികളില് ചികിത്സ തേടണമെന്നാണ് നിര്ദേശം. കൂടാതെ 21 ദിവസംവരെ സ്വയം നിരീക്ഷിക്കണമെന്നും നിര്ദേശമുണ്ട്. എല്ലാ ജില്ലകളിലും ഐസലേഷന് വാര്ഡുകളും സജ്ജീകരിക്കുകയാണ്. മങ്കി പോക്സ് സ്ഥിരീകരിച്ച കൊല്ലം സ്വദേശി സഞ്ചരിച്ച ടാക്സിയുടെ ഡ്രൈവറെ കണ്ടെത്തി. രോഗി തിരുവനന്തപുരം മെഡിക്കല് കോളജിലേക്ക് സഞ്ചരിച്ച ടാക്സിയുടെ ഡ്രൈവറെയാണ് കണ്ടെത്തിയത്.
രോഗി സഞ്ചരിച്ച ഓട്ടോറിക്ഷയിലെ ഡ്രൈവര്മാരെ കഴിഞ്ഞ ദിവസം കണ്ടെത്തിയിരുന്നു. ഇവരെ നിരീക്ഷണത്തിലാക്കിയിരിക്കുകയാണ്. മങ്കി പോക്സ് സ്ഥിരീകരിച്ച രോഗി ചികിത്സയില് കഴിഞ്ഞ തിരുവനന്തപുരം മെഡിക്കല് കോളജില് ഇന്ന് കേന്ദ്രസംഘം സന്ദര്ശനം നടത്തും. എല്ലാ ജില്ലകളിലും ജാഗ്രതാ നിര്ദേശം നല്കിയിട്ടുണ്ടെങ്കിലും തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം ജില്ലകളില് പ്രത്യേക ജാഗ്രത നിര്ദേശം നല്കിയിട്ടുണ്ട്. ഈ ജില്ലകളില് നിന്നുള്ളവര് രോഗിക്കൊപ്പം വിമാനത്തില് സഞ്ചരിച്ചതിനാലാണ് പ്രത്യേക ജാഗ്രതാ നിര്ദേശം.
