കൊച്ചി: മോന്സന് മാവുങ്കല് പ്രതിയായ പുരാവസ്തു തട്ടിപ്പ് കേസില് രണ്ടാം പ്രതിയാക്കിയ സാഹചര്യത്തില് മുന്കൂര് ജാമ്യഹര്ജിയുമായി കെ.പി.സി.സി അധ്യക്ഷന് കെ. സുധാകരന്. മുന്കൂര് ജാമ്യം തേടി സുധാകരന് നാളെ ഹൈകോടതിയില് ഹരജി നല്കും. കേസില് ചോദ്യം ചെയ്യാന് ബുധനാഴ്ച ഹാജരാകണമെന്ന് ആവശ്യപ്പെട്ട് സുധാകരന് ക്രൈംബ്രാഞ്ച് ഇന്ന് നോട്ടിസ് നല്കിയിരുന്നു. കളമശ്ശേരിയിലെ ഓഫിസില് ഹാജരാകണമെന്നാണ് ക്രൈംബ്രാഞ്ച് നിര്ദേശിച്ചിട്ടുള്ളത്.
മോന്സന് മാവുങ്കല് തട്ടിപ്പ് നടത്തിയതുമായി ബന്ധപ്പെട്ട് സുധാകരെന്റെ പങ്കാളിത്തം അന്വേഷിക്കണമെന്ന് പരാതിക്കാരന് ആവശ്യപ്പെട്ടിരുന്നു. സുധാകരന്റെ സാന്നിധ്യത്തിലാണ് പരാതിക്കാരനായ അനൂപ് 25 ലക്ഷം രൂപ മോന്സന് മാവുങ്കലിന് കൈമാറിയത്. അതുകൊണ്ടുതന്നെ സുധാകരനെ ചോദ്യം ചെയ്താലേ കൂടുതല് വിവരങ്ങള് പുറത്തുവരുകയുള്ളൂവെന്ന നിലപാടിലാണ് ക്രൈംബ്രാഞ്ച്. പുരാവസ്തു വില്പ്പനക്കാരനെന്ന് അവകാശപ്പെട്ട് കോടികളുടെ സാമ്പത്തിക തട്ടിപ്പ് നടത്തിയ കേസിലാണ് മോന്സന് മാവുങ്കല് കുടുങ്ങിയത്.
