തിരുവനന്തപുരം : സംസ്ഥാനത്ത് ലോക്ഡൗണ് നീട്ടിയേക്കുമെന്നു സൂചന നല്കി മുഖ്യമന്ത്രി പിണറായി വിജയന്. എന്നാല് നിയന്ത്രണങ്ങളില് ഇളവുകള് പരിഗണിച്ചേക്കുമെന്നും സൂചിപ്പിച്ചു. ഇപ്പോഴത്തെ സാഹചര്യം പരിഗണിക്കുമ്പോള് ലോക്ഡൗണ് അവസാനിക്കാറായി എന്നു പറയാറായിട്ടില്ലെന്നു മുഖ്യമന്ത്രി പറഞ്ഞു.
തീരുമാനമെടുക്കാന് രണ്ടു മൂന്നു ദിവസം കൂടിയുണ്ട്. കോവിഡ് വ്യാപന നിയന്ത്രണത്തിനാണ് സര്ക്കാര് പ്രഥമ പരിഗണന നല്കുന്നത്. എന്നാല് ജനങ്ങളുടെ ജീവസന്ധാരണത്തിനുള്ള മാര്ഗങ്ങള് പരമാവധി തുറന്നു കൊടുക്കുകയും വേണം. ഇതു രണ്ടും കൂടിയുള്ള സമതുലിതമായ തീരുമാനമെടുക്കാനാണ് സര്ക്കാര് ശ്രമിക്കുന്നതെന്നു മുഖ്യമന്ത്രി പറഞ്ഞു. വരുന്ന ഞായറാഴ്ചയാണു നിലവിലുള്ള ലോക്ഡൗണ് അവസാനിക്കുന്നത്.
