തിരുവനന്തപുരം: രക്തബന്ധത്തില്പ്പെട്ട സ്ത്രീയെ ഭാര്യയാക്കി വയ്ക്കുകയും അവരുടെ ആദ്യബന്ധത്തില്പ്പിറന്ന പെണ്കുട്ടികളോട് ലൈംഗികാതിക്രമം കാട്ടുകയും ചെയ്ത കേസിലെ പ്രതിക്ക് ജീവിതാന്ത്യംവരെ ജീവപര്യന്തം തടവും 14.5 ലക്ഷം രൂപ പിഴയും വിധിച്ചു. ആറ്റിങ്ങല് അതിവേഗ സ്പെഷ്യല് കോടതി ജഡ്ജി സി.ആര്. ബിജുകുമാറാണ് ശിക്ഷ വിധിച്ചത്. അച്ചന്കോവില് പോലീസ് എഫ്.ഐ.ആര്. രജിസ്റ്റര് ചെയ്യുകയും പള്ളിക്കല് പോലീസ് അന്വേഷണം പൂര്ത്തിയാക്കി കുറ്റപത്രം സമര്പ്പിക്കുകയും ചെയ്ത കേസിലാണ് വിധി. പ്രതിയുടെ മാതൃസഹോദരീപുത്രിയുടെ കുട്ടികളാണ് ക്രൂരമായ ലൈംഗിക പീഡനങ്ങള്ക്ക് ഇരകളായത്. ഭര്ത്താവുമായി പിണങ്ങിയതിനെത്തുടര്ന്നാണ് പെണ്കുട്ടികളുടെ അമ്മ കുട്ടികളെയും കൂട്ടി പ്രതിക്കൊപ്പം താമസിക്കാന് തുടങ്ങിയത്.
പ്രതി കുട്ടികളോട് ലൈംഗികാതിക്രമം കാട്ടുകയും നിര്ബന്ധിച്ച് മദ്യം കുടിപ്പിക്കുകയും ശാരീരികമായി ഉപദ്രവിക്കുകയും ചെയ്തു. ആരോഗ്യപ്രശ്നങ്ങളുണ്ടായിട്ടും ആശുപത്രിയില് കൊണ്ടുപോയില്ല. വാടകവീടുകളില് മാറിമാറിത്താമസിച്ചായിരുന്നു പീഡനം. പ്രതിയുടെ അതിക്രമത്തെത്തുടര്ന്ന് പെണ്കുട്ടികളും അമ്മയും ബന്ധുവീട്ടില് അഭയം തേടി. ഇതിനെത്തുടര്ന്നാണ് കുട്ടികള് പ്രതിക്കെതിരെ പോലീസില് മൊഴി നല്കിയത്.
