പത്തനംതിട്ട : സാമൂഹ്യ പ്രവർത്തക ഡോ. എം. എസ്. സുനിൽ ഭവന രഹിതർക്ക് പണിതു നൽകുന്ന 173 – മത്തെ വീട് മെതുകുമ്മെൽ ഗ്രീഷ്മ ഭവനത്തിൽ ഗിരീഷിനും കുടുംബത്തിനുമായി വിദേശ മലയാളിയായ ജോമോന്റെ സഹായത്താൽ നിർമ്മിച്ചു നൽകി. വീടിന്റെ താക്കോൽ ദാനം കെ. ബി. ഗണേഷ്കുമാർ എം. എൽ. എ. നിർവഹിച്ചു. ചടങ്ങിൽ ലിൻസി വർഗീസ്, സജി കുമാർ, താജുദീൻ. എ., കെ. പി. ജയലാൽ, സന്തോഷ്. എം. സാം., അമ്പിളി എന്നിവർ പങ്കെടുത്തു.
നട്ടെല്ലിന് അകൽച്ച മൂലം കാലിന്റെ സ്വാധീനം നഷ്ടപ്പെട്ട ഗിരീഷും ഭാര്യയും രണ്ടു പെൺകുഞ്ഞുങ്ങളും താമസിച്ചുവന്നത് അടച്ചുറപ്പില്ലാത്ത ഒരു ഷെഡിലായിരുന്നു. രണ്ടു മാസം പ്രായമായ കൈകുഞ്ഞുമായി എന്ത് ചെയ്യണമെന്നറിയാതെ ബുദ്ധിമുട്ടിയിരുന്ന അവരുടെ അവസ്ഥ നേരിട്ടു കാണാൻ ഇടയായ സുനില് ടീച്ചർ വിദേശ മലയാളിയായ ജോമോൻ നൽകിയ മൂന്നര ലക്ഷം രൂപ ഉപയോഗിച്ച് രണ്ടു മുറികളും ഹാളും അടുക്കളയും ശുചിമുറിയും സിറ്റൗട്ടും അടങ്ങിയ 600 സ്കയര് ഫീറ്റ് വലുപ്പമുള്ള വീട് നിർമ്മിച്ചു നൽകുകയായിരുന്നു.
