തിരുവനന്തപുരം : മുല്ലപ്പെരിയാര് ബേബി ഡാമിനു സമീപത്തെ മരങ്ങള് മുറിക്കാന് അനുമതി നല്കിയ സംഭവത്തില് കുറ്റക്കാര്ക്കെതിരെ നടപടി വേണമെന്നു സിപിഐ സംസ്ഥാന സെക്രട്ടറി കാനം രാജേന്ദ്രന്. രാഷ്ട്രീയ നേതൃത്വം ഇക്കാര്യം ഗൗരവമായി പരിഗണിക്കണം. മുല്ലപ്പെരിയാര് കേരളത്തിന്റെ പ്രധാന വിഷയമാണ്. ഉദ്യോഗസ്ഥര് തന്നെ തീരുമാനമെടുക്കുന്നതു ശരിയല്ലെന്നും ഇന്ധന നികുതി സംസ്ഥാനം കുറയ്ക്കേണ്ട ആവശ്യമില്ലെന്നും കാനം പറഞ്ഞു.
കേരളത്തില് ആറു വര്ഷമായി നികുതി വര്ധിപ്പിച്ചിട്ടില്ല. ഉമ്മന്ചാണ്ടി സര്ക്കാരിന്റെ കാലത്തെക്കാള് ഒരു ശതമാനം കുറവ് നികുതിയാണ് ഇപ്പോള് ഈടാക്കുന്നത്. നികുതി കൂട്ടിയവര് കുറയ്ക്കട്ടെ എന്നും കാനം പറഞ്ഞു. ജി.സുധാകരനെതിരായ നടപടി സിപിഎമ്മിന്റെ ആഭ്യന്തര കാര്യമായി കണ്ടാല് മതിയെന്നും കാനം രാജേന്ദ്രന് പ്രതികരിച്ചു.
