ഇടുക്കി : മുല്ലപ്പെരിയാര് അണക്കെട്ടില് ജലനിരപ്പ് വര്ധിച്ചതോടെ 8 എട്ട് ഷട്ടറുകള് 60 സെന്റിമീറ്റര് വീതം ഉയര്ത്തി. നിലവില് ജലനിരപ്പ് 138.95 അടിയാണ്. പുറത്തേക്കൊഴുക്കുന്ന വെളളത്തിന്റെ അളവിനേക്കാള് കൂടുതലാണ് നീരൊഴുക്ക്. 3,981 ഘനയടി വെള്ളം പുറത്തേക്കൊഴുക്കി തുടങ്ങിയതോടെ പെരിയാറിന്റെ തീരത്തുള്ളവര്ക്ക് ജാഗ്രതാ നിര്ദേശം നല്കി. പുലര്ച്ചെ വരെയുണ്ടായ ശക്തമായ മഴയാണ് ഡാമില് ജലനിരപ്പുയരാന് കാരണം. വൃഷ്ടിപ്രദേശത്ത് മഴ കനത്തതോടെ നീരൊഴുക്ക് വര്ധിച്ചു. കേന്ദ്ര ജല കമ്മിഷന് അംഗീകരിച്ച റൂള് കര്വ് പ്രകാരം തമിഴ്നാടിന് നവംബര് 10 വരെ ജലനിരപ്പ് 139.5 അടിയായി നിലനിര്ത്താം.
തുലാവര്ഷം കണക്കിലെടുത്ത് ജലനിരപ്പ് 139.5 അടി എത്തിക്കാന് തമിഴ്നാട് ശ്രമിക്കുന്നില്ല. ജലനിരപ്പ് 138 എത്തിയതോടെ സ്പില്വേയിലെ 5 ഷട്ടറുകള് തമിഴ്നാട് ഇന്നലെ അടച്ചിരുന്നു. ബാക്കിയുള്ള ഒരു ഷട്ടറിലൂടെ പുറത്തുവിടുന്ന വെള്ളത്തിന്റെ അളവ് പകുതിയുമാക്കിയിരുന്നു. എന്നാല് അപ്രതീക്ഷിത മഴയാണ് വീണ്ടും ആശങ്കയായിരിക്കുന്നത്. ഷട്ടറുകള് വീണ്ടും തുറന്നതിനെതിരെ തമിഴ്നാട്ടില് പ്രതിഷേധം പുകയുന്നുണ്ട്. അണക്കെട്ടിലെ സ്ഥിതിഗതികള് വിലയിരുത്തുന്നതിനായി തമിഴ്നാട് ജലവിഭവ മന്ത്രി ദുരൈമുരുകന് വെള്ളിയാഴ്ച അണക്കെട്ട് സന്ദര്ശിക്കും. അതേസമയം, മുല്ലപ്പെരിയാര് ജലനിരപ്പ് കൃത്യമായി നിരീക്ഷിച്ചു വരുകയാണെന്നു മുഖ്യമന്ത്രി പിണറായി വിജയന്. പുതിയ ഡാം പണിയണമെന്ന കേരളത്തിന്റെ ആവശ്യവും, ജലനിരപ്പ് ഉയര്ന്നാലുള്ള അപകട സാധ്യതയും സുപ്രീം കോടതിയെ അറിയിച്ചിട്ടുണ്ട്.
