മൂന്നാർ: മൂന്നാറിലെത്തുന്ന വിനോദസഞ്ചാരികൾക്കിനി തുച്ഛമായ നിരക്കിൽ സൗകര്യപ്രദമായി കെഎസ്ആർടിസി ബസ്സിൽ താമസിക്കാം. വിനോദസഞ്ചാരികൾക്ക് താമസമൊരുക്കുന്നതിനായി 2 എസി ബസുകളാണ് കെഎസ്ആർടിസി സജ്ജമാക്കിയിരിക്കുന്നത്. ഓരോന്നിലും 16 കിടക്കകൾ വീതമുണ്ട്.
നവംബർ 14 മുതലാണ് ബസ് സഞ്ചാരികൾക്കായി ദിവസവാടകയ്ക്കു നൽകി തുടങ്ങിയത്. മിക്കവാറും ദിവസങ്ങളിൽ ഇരുബസുകളും ഫുൾ ആണ്. കഴിഞ്ഞ 15 ദിവസത്തിനിടെ 55,280 രൂപയാണ് ഇതുവഴി കെഎസ്ആർടിസിക്ക് വരുമാനമായി ലഭിച്ചത്.
ഒരു കിടക്കയ്ക്ക് ഒരു ദിവസത്തേക്ക് 100 രൂപയാണ് ഈടാക്കുന്നത്. കമ്പിളി ആവശ്യമെങ്കിൽ 50 രൂപ അധികം നൽകണം. മൂന്നാർ ഡിപ്പോയിലെ കൗണ്ടറിൽ ബുക്ക് ചെയ്തു പണം അടച്ച് വൈകിട്ട് 5നു ബസിൽ പ്രവേശിക്കാം. ഡിപ്പോയിൽത്തന്നെയാണു രാത്രി ബസുകൾ നിർത്തിയിടുന്നത്. താമസക്കാർക്കു ഡിപ്പോയിലെ ശുചിമുറികൾ ഉപയോഗിക്കാം. 16 കിടക്കകളാണ് ഒരു ബസിൽ ഉള്ളതെങ്കിലും 1600 രൂപ നൽകി ഒന്നോ രണ്ടോ പേർക്കു മാത്രമായും ഇവ ബുക്ക് ചെയ്യാം. സമീപത്തു ഭക്ഷണശാലകളുമുണ്ട്.