കല്പറ്റ: മേപ്പാടിയില് അമ്മയ്ക്കൊപ്പം അങ്കണവാടിയിലേക്ക് പോകും വഴി അയല്വാസിയുടെ വെട്ടേറ്റ നാലുവയസുകാരന് മരിച്ചു. നെടുമ്പാല പാറയ്ക്കല് ജയപ്രകാശിന്റെ മകന് ആദിദേവാണ് മരിച്ചത്. വ്യാഴാഴ്ച രാവിലെ ഒന്പതിനാണ് അയല്വാസി ജിതേഷ് ജയപ്രകാശിന്റെ ഭാര്യ അനിലയെയും മകന് ആദിദേവിനെയും വെട്ടിയത്. മേപ്പാടി പള്ളിക്കവലയില് വെച്ചായിരുന്നു സംഭവം നടന്നത്. ജയപ്രകാശിന്റെ ഭാര്യയ്ക്കും ഗുരുതരമായി പരുക്കേറ്റിരുന്നു. കൈകള്ക്കും തലയ്ക്കുമാണു പരുക്ക്. തലയ്ക്കും ഇടതുചെവിയുടെ ഭാഗത്തും വെട്ടേറ്റ ആദിദേവ് കോഴിക്കോട് മെഡിക്കല് കോളജില് ചികിത്സയിലായിരുന്നു.
നാട്ടുകാരാണ് ഇരുവരെയും ആശുപത്രിയില് എത്തിച്ചത്. ജിതേഷിനെ അന്നുതന്നെ പോലീസ് അറസ്റ്റ് ചെയ്തിരുന്നു. ജയപ്രകാശും പ്രതിയും തമ്മില് ചില ബിസിനസ് ഇടപാടുകള് ഉണ്ടായിരുന്നുവെന്നും ഇതിനെ തുടര്ന്നു പ്രശ്നങ്ങള് നിലനിന്നിരുന്നുവെന്നാണ് റിപ്പോര്ട്ട്. വ്യക്തിവൈരാഗ്യമാണ് കൊലപാതകത്തില് കലാശിച്ചതെന്നു പോലീസ് പറയുന്നു. അനിലയെയും ആദിദേവിനെയും വെട്ടിയതിനു ശേഷം ജിതേഷ് ഉപേക്ഷിച്ച വാക്കത്തിയും പോലീസ് കണ്ടെടുത്തിരുന്നു.
