ന്യൂഡല്ഹി : 23കാരനായ ഗുസ്തി താരം കൊല്ലപ്പെട്ട കേസില് ഒളിമ്പിക് മെഡല് ജേതാവ് സുശീല് കുമാറിനെ ഡല്ഹി പോലീസ് അറസ്റ്റ് ചെയ്തു. ഗുസ്തിയില് ജൂനിയര് തലത്തില് ദേശീയ ചാമ്പ്യനായ സാഗര് കൊല്ലപ്പെട്ട കേസില് സുശീല് കുമാര് ഒളിവിലായിരുന്നു. ഹരിദ്വാറിലെ യോഗാ ആശ്രമത്തില് ഇയാള് ഒളിവില് കഴിയുന്നതായി റിപ്പോര്ട്ടുകള് പുറത്തുവന്നിരുന്നു. ഇതിനു പിന്നാലെയാണ് അറസ്റ്റ്.
മേയ് നാലിന് ഛത്രസാല് സ്റ്റേഡിയത്തിലെ പാര്ക്കിംഗില് വെച്ചുണ്ടായ തര്ക്കത്തിനിടെയാണ് സാഗര് കൊല്ലപ്പെടുന്നത്. സുശീല് വാടകയ്ക്ക് നല്കിയിരുന്ന ഫ്ളാറ്റുകളിലൊന്ന് ഒഴിയുന്നതുമായി ബന്ധപ്പെട്ട തര്ക്കമാണ് പ്രകോപനമെന്നും പോലീസ് പറയുന്നു. കൊലപാതകം, ഗൂഢാലോചന എന്നീ കുറ്റങ്ങളാണ് സുശീല് കുമാറിനെതിരെ ചുമത്തിയിരിക്കുന്നത്. സുശീല് കുമാറിന് മുന്കൂര് ജാമ്യം നല്കാനാവില്ലെന്ന് ഡല്ഹി ഹൈക്കോടതി നേരത്തെ പറഞ്ഞിരുന്നു. സുശീല് കുമാറിനെതിരെ ജാമ്യമില്ലാ വാറന്റായിരുന്നു പുറപ്പെടുവിച്ചിരുന്നത്.
