കൊല്ലം : ഉത്സവ ആഘോഷത്തിനിടയില് ഉണ്ടായ അടിപിടിയില് യുവാവ് വെട്ടേറ്റ് മരിച്ചു. കോക്കാട് മനുവിലാസത്തില് മനോജ് (39) ആണ് കൊല്ലപ്പെട്ടത്. കൊല്ലം വെട്ടിക്കവല കോക്കാട് ശിവക്ഷേത്രത്തിലെ ഉത്സവ ആഘോഷവുമായി ബന്ധപ്പെട്ട് കഴിഞ്ഞ ദിവസം രാത്രിയാണ് സംഘര്ഷമുണ്ടായത്. വെട്ടേറ്റ നിലയില് കോക്കാട് റോടില് കിടക്കുകയായിരുന്ന മനോജിനെ പുനലൂര് താലൂക്ക് ആശുപത്രിയിലും തുടര്ന്ന് തിരുവനന്തപുരം മെഡിക്കല് കോളേജിലും എത്തിച്ചെങ്കിലും ജീവന് രക്ഷിക്കാനായില്ല.
കൈകളിലെ വിരലുകള് വെട്ടി മാറ്റിയ നിലയിലും കഴുത്തിന് വെട്ടേറ്റ നിലയിലുമാണ് മനോജ് റോഡില് കിടന്നിരുന്നതെന്ന് പ്രദേശവാസികള് പറയുന്നു. യൂത്ത് ഫ്രണ്ട് ചക്കുവരയ്ക്കല് മണ്ഡലം പ്രസിഡണ്ട് ആണ് കൊല്ലപ്പെട്ട മനോജ്. സംഭവത്തില് പോലീസ് കേസെടുത്ത് അന്വേഷണം ആരംഭിച്ചിട്ടുണ്ട്. പ്രതികളെ കുറിച്ച് സൂചന ലഭിച്ചതായും ഉടന് പിടിയിലാകുമെന്നും പോലീസ് അറിയിച്ചു.
