ഡെറാഡൂണ്: ഉത്തരാഖണ്ഡിലെ ഋഷികേശിലെ റിസോര്ട്ട് ജീവനക്കാരി അങ്കിത ഭണ്ഡാരിയുടെ കൊലപാതക കേസില് തുടര്നടപടിയുമായി സംസ്ഥാന സര്ക്കാര്.
കേസില് പ്രതിയായ പുള്കിത് ആര്യയുടെ വനാന്തര റിസോര്ട്ട് പുലര്ച്ചെ സര്ക്കാര് പൊളിച്ചുനീക്കി. ബിജെപി നേതാവും സംസ്ഥാന മന്ത്രിസഭാംഗവുമായിരുന്ന വിനോദ് ആര്യയുടെ മകനായ പുള്കിത് ആര്യ കേസിലെ പ്രധാന പ്രതിയാണ്. കേസില് മറ്റ് രണ്ട് യുവാക്കള് കൂടി അറസ്റ്റിലായിരുന്നു.
സെപ്റ്റംബര് 18-നാണ് ആര്യയുടെ റിസോര്ട്ടിലെ റിസപ്ഷനിസ്റ്റായ 19 വയസുകാരി അങ്കിത ഭണ്ഡാരിയെ കാണാതായത്. കേസിന്റെ തുടക്കത്തില് പോലീസുമായി സഹകരിച്ച യുവാവ് വിശദമായ ചോദ്യംചെയ്യലിലാണ് കുറ്റസമ്മതം നടത്തിയത്. യുവതിയുടെ മൃതദേഹം ഇതുവരെ കണ്ടെത്തിയിട്ടില്ല. രണ്ട് കൂട്ടുപ്രതികളോടൊപ്പം ചേര്ന്ന് ആര്യ മൃതദേഹം സമീപത്തെ നദിയില് ഒഴുക്കിയെന്നാണ് സംശയിക്കുന്നത്.
