തിരുവനന്തപുരം : ഭാവിയുടെ തൊഴില് മേഖല ഡിജിറ്റല് രംഗമാണെന്ന് മന്ത്രി എം.വി ഗോവിന്ദന്. ലോകത്താകമാനം ഡിജിറ്റല് രംഗത്ത് വരുന്ന തൊഴിലവസരങ്ങളില് ഇരുപത് ലക്ഷം തൊഴിലിനെങ്കിലും മലയാളി വിദ്യാര്ത്ഥികളെ സജ്ജരാക്കുക എന്നതാണ് സര്ക്കാര് ലക്ഷ്യം. പല മേഖലകളിലും വികസിത രാജ്യങ്ങളോട് കിടപിടിക്കുന്ന തരത്തിലേക്ക് വളരാന് സംസ്ഥാനത്തിനായിട്ടുണ്ട്. അതില് യൂറോപ്പിലെ മലയാളികളുടെ പങ്ക് വളരെ വലുതാണന്നും മന്ത്രി ലോക കേരള സഭയുടെ യൂറോപ്പ് മേഖല സമ്മേളനത്തില് അഭിപ്രായപ്പെട്ടു.
കഴിഞ്ഞ ലോക കേരള സഭയില് യൂറോപ്പുമായി ബന്ധപ്പെട്ട് ഉയര്ന്നു വന്ന വിഷയങ്ങളില് 21 എണ്ണത്തിന് പരിഹാരം കാണാന് കഴിഞ്ഞു. പുതിയ കാലഘട്ടം ആവശ്യപ്പെടുന്ന മാറ്റത്തിലേക്ക് ചുവടുവയ്ക്കാന് സംസ്ഥാനത്തിന് സഹായകമാകുന്ന നിര്ദ്ദേശങ്ങളാണ് ലോക കേരളസഭ യൂറോപ്പ് മേഖല സമ്മേളനത്തില് ഉയര്ന്ന് വന്നത്.