കോന്നി: വായനാദിനത്തോടനുബന്ധിച്ച് കോന്നി പ്രശാന്തി പബ്ലിക് സ്കൂളിലെ നല്ലപാഠം യൂണിറ്റിന്റെ നേതൃത്വത്തില് വിപുലമായ പരിപാടികള് സംഘടിപ്പിച്ചു. ജൂണ് 19-ന് ആരംഭിച്ച് 25 -ന് അവസാനിക്കുന്ന വായനാ വാരത്തിനും, ജൂലൈ 18 -ന് അവസാനിക്കുന്ന വായനാ മാസാചരണത്തിനും തുടക്കംകുറിച്ചു. വായനാദിനത്തോടനുബന്ധിച്ച് സ്കൂളില് ആരംഭിച്ച ലൈബ്രറിയുടെ ഉദ്ഘാടനം പ്രശസ്ത എഴുത്തുകാരി അല്ഫിയ ജലീല് നിര്വ്വഹിച്ചു. വായനയുടെ സ്വാധീനം എങ്ങനെയാണ് വ്യക്തിത്വവികാസത്തിലേക്ക് നയിക്കുന്നതെന്ന് ഉദാഹരണസഹിതം വ്യക്തമാക്കിയ അല്ഫിയ, താന് രചിച്ച പുസ്തകങ്ങളായ ‘പറയാനുള്ളത് കേള്ക്കാമോ’, ‘കുട്ടുറുമ്മീസ്’, ‘ചീന്തിയെടുത്തവ ‘ എന്നിവ സ്കൂള് ലൈബ്രറിയിലേക്ക് സംഭാവന ചെയ്തു.
കഥ, കവിത, നോവല്, വിവിധ മാഗസിനുകള് എന്നിവയുടെ വിപുലമായ ശേഖരമാണ് ലൈബ്രറിയില് ക്രമീകരിച്ചിട്ടുള്ളത്. റിപ്പബ്ലിക്കന് വൊക്കേഷണല് ഹയര് സെക്കന്ററി സ്കൂള് ഹെഡ്മാസ്റ്റര് ആര്. ശ്രീകുമാര് വായനാദിന സന്ദേശം നല്കി. സ്കൂള് പ്രിന്സിപ്പാള് നിര്മ്മല പിള്ളയുടെ അധ്യക്ഷത വഹിച്ചു. യോഗത്തില് സ്കൂള് മാനേജര് എന്.മനോജ്, ട്രസ്റ്റ് അംഗം കെ.എസ്.ശശികുമാര്, റിപ്പബ്ലിക്കന് സ്കൂള് അധ്യാപകന് പ്രമോദ് കുമാര്, നല്ലപാഠം കോ ഓര്ഡിനേറ്റര്മാരായ ഷിജി വി, സംഗീത എസ്.നായര്, അധ്യാപികയായ മായ ജി.നായര് എന്നിവര് ചടങ്ങില് പങ്കെടുത്തു.
