ആലപ്പുഴ: വ്യാജ ഡിഗ്രി വിവാദത്തില് എസ് എഫ് ഐ നേതാവ് നിഖില് തോമസിനെ കായം കുളം എം എസ് എം കോളജില് നിന്നും സസ്പെന്ഡ് ചെയ്തു. ഇയാള്ക്കെതിരെ നിയമനടപടി സ്വീകരിക്കുമെന്നും കോളജ് പ്രിന്സിപ്പല് വ്യക്തമാക്കി. ഈ വിഷയം അന്വേഷിക്കാന് വേണ്ടി ആറംഗ സമിതിയെ ചുമതലപ്പെടുത്തുമെന്നും കോളജ് അധികൃതര് അറിയിച്ചു. രണ്ട് ദിവസത്തിനകം സമിതി റിപ്പോര്ട്ട് നല്കണം.കേരള സര്വ്വകലാശാല നല്കിയ തുല്യതാ സര്ട്ടിഫിക്കറ്റിന്റെ അടിസ്ഥാനത്തിലാണ് നിഖില് തോമസിന് പ്രവേശനം നല്കിയതെന്നും അദ്ദേഹം പറഞ്ഞു.
യൂണിവേഴ്സിറ്റി നിയമത്തിന് വിധേയമായാണ് നിഖിലിന് പ്രേവശനം കൊടുത്തത്. 28-1-2022 ലാണ് നിഖിലിന് പ്രവേശനം നല്കിയതെന്നും പ്രിന്സിപ്പില് പറഞ്ഞു. കലിംഗ സര്വ്വകലാശാലയുടെ ബികോം സര്ട്ടിഫിക്കറ്റ് ഹാജാരാക്കിയാണ് നിഖില് തോമസ് എം കോമിന് പ്രവേശനം നേടിയത്. എന്നാല് കലിംഗ സര്വ്വകലാശാല ഇയാള് തങ്ങളുടെ സര്വ്വകലാശാലയില് പഠിച്ചിട്ടില്ലന്ന് വ്യക്തമാക്കുകയുണ്ടായി. അതോടെയാണ് നിഖില് സമര്പ്പിച്ചത് വ്യാജ സര്ട്ടിഫിക്കറ്റാണ് എന്ന് വ്യക്തമായത്.
