നാരങ്ങാനം : പുന്നോൺ, വട്ടത്തറ, വെട്ടിമൂട്ടിൽ ഭാഗങ്ങളിലെ വോൾട്ടേജ് ക്ഷാമത്തിന് പരിഹാരമായില്ല. ഒരു വർഷത്തിലേറെയായി നിരന്തരം ആവശ്യപ്പെട്ടിട്ടും ഫലം കാണാതെ വന്നപ്പോൾ ആറു മാസം മുൻപ് വൈദ്യുതി വകുപ്പ് മന്ത്രി എം എം മണിക്ക് അദാലത്തിൽ നിവേദനം നല്കിയിരുന്നു. ഇതിനെത്തുടര്ന്ന് ഇവിടെ ത്രീ ഫേസ് ലൈൻ സ്ഥാപിക്കാൻ മന്ത്രി നിര്ദ്ദേശം നല്കിയിരുന്നെങ്കിലും ഉദ്യോഗസ്ഥര് ഇത് നടപ്പിലാക്കിയിട്ടില്ല.
സന്ധ്യ കഴിഞ്ഞാൽ ലൈറ്റിനൊപ്പം മെഴുകുതിരിയും കത്തിച്ച് വെയ്ക്കേണ്ട അവസ്ഥയിലാണ് പ്രദേശവാസികൾ. ഇലക്ട്രോണിക് ഉപകരണങ്ങൾ സന്ധ്യ കഴിഞ്ഞാൽ പ്രവർത്തിക്കില്ല. വട്ടക്കാവ് ജംഗ്ഷന് സമീപം സ്ഥാപിച്ചിട്ടുള്ള ട്രാൻസ്ഫോര്മറിൽ നിന്നാണ് ഈ ഭാഗങ്ങളിലേക്ക് വൈദ്യുതി എത്തിക്കുന്നത് . അറുപതോളം വീട്ടുകാരാണ് വോൾട്ടേജില്ലാതെ വിഷമിക്കുന്നത്. അദാലത്തിൽ ഉണ്ടായ തീരുമാനപ്രകാരം ഈ പ്രദേശത്ത് ത്രീ ഫേസ് ലൈൻ സ്ഥാപിക്കുന്നതിന് കെ.എസ്.ഇ.ബി നടപടി സ്വീകരിക്കണമെന്ന് നാട്ടുകാർ ആവശ്യപ്പെടുന്നു.
