പത്തനംതിട്ട : ജില്ലാ ദുരന്ത നിവാരണ അതോറിറ്റിയുടെ നേതൃത്വത്തില് ഈ മാസം അഞ്ചു മുതല് 16 വരെ ദേശീയ ദുരന്തനിവാരണ സേനയുടെ(എന്ഡിആര്എഫ്) ആരക്കോണം നാലാം ബറ്റാലിയന്റെ പരിചയപ്പെടുത്തല് പരിപാടി ജില്ലയില് സംഘടിപ്പിക്കുമെന്ന് ജില്ലാ ദുരന്ത നിവാരണ അതോറിറ്റി ചെയര്മാനും ജില്ലാ കളക്ടറുമായ പി.ബി നൂഹ് അറിയിച്ചു.
ജില്ലയിലെ ദുരന്ത സാധ്യതകള് സംബന്ധിച്ച വിവരങ്ങള് ചര്ച്ച ചെയ്യുക, ജില്ലയിലെ ദുര്ബല പ്രദേശങ്ങള് സന്ദര്ശിച്ച് വിദ്യാര്ഥികള്ക്ക് അവബോധം നല്കുക, ദുരന്തം ഉണ്ടായാല് അവയെ അഭിമുഖീകരിക്കാന് ജില്ലയിലെ പ്രധാന ആശുപത്രികള് സജ്ജമാണോ എന്നു പരിശോധിക്കുക, നിര്വഹണ ഉദ്യോഗസ്ഥരുമായി കൂടിക്കാഴ്ച തുടങ്ങിയ പരിപാടികളാണ് പര്യടനത്തിലുള്ളത്. കോഴഞ്ചേരി എല്.ആര് തഹസില്ദാര് വി. എസ് വിജയകുമാറിനെ നോഡല് ഓഫീസറായും ജില്ലാ ഫയര് ആന്ഡ് റെസ്ക്യൂ സര്വീസ് സ്റ്റേഷന് ഓഫീസര് വി. വിനോദ് കുമാറിനെ അസിസ്റ്റന്ഡ് നോഡല് ഓഫീസറായും നിയോഗിച്ചു.
