ജിദ്ദ: പത്തനംതിട്ട സ്വദേശിയായ സാമൂഹിക പ്രവര്‍ത്തകന്‍ ജിദ്ദയില്‍ മരിച്ചു. അടൂര്‍ മണക്കാല തൂവയൂര്‍ നോര്‍ത്ത് സ്വദേശി അശ്വിന്‍ വിഹാറില്‍ ഷാജി ഗോവിന്ദ് (59) ആണ് തിങ്കളാഴ്ച പുലര്‍ച്ചയോടെ മരിച്ചത്.
ന്യുമോണിയ ബാധിച്ച്‌ മൂന്ന് ആഴ്ചകളോളമായി ജിദ്ദ നാഷനല്‍ ആശുപത്രിയിലും തുടര്‍ന്ന് കിങ് അബ്ദുള്ള മെഡിക്കല്‍ സെന്‍ററിലുമായി ചികിത്സയിലായിരുന്നു. ജിദ്ദയിലെ സാമൂഹിക, കലാസാംസ്‌കാരിക, രാഷ്ട്രീയ മേഖലകളില്‍ നിറഞ്ഞു നിന്നിരുന്ന ഷാജി ഗോവിന്ദ് രണ്ട് പതിറ്റാണ്ടിലേറെയായി സൗദി ആരോഗ്യ മന്ത്രാലയത്തിലായിരുന്നു ജോലി ചെയ്തിരുന്നത്. അടുത്ത ദിവസങ്ങളിലായി പ്രവാസം അവസാനിപ്പിച്ച്‌ നാട്ടിലേക്ക് മടങ്ങുന്നതിനുള്ള തയ്യാറെടുപ്പിനിടെയാണ് മരണം സംഭവിച്ചത് .
ഒ.ഐ.സി.സി ജിദ്ദ-പത്തനംതിട്ട ജില്ലാ കമ്മിറ്റി സെക്രട്ടറിയായ ഇദ്ദേഹം പത്തനംതിട്ട ജില്ലാ സംഗമം സ്ഥാപക അംഗം കൂടിയാണ്. പിതാവ്: പരേതനായ ഗോവിന്ദ്, മാതാവ്: കൗസല്യ, ഭാര്യ: ശ്രീന ഷാജി, മക്കള്‍: അശ്വിന്‍ ഷാജി, അശ്വതി ഷാജി, സഹോദരങ്ങള്‍: സഞ്ജീവ്, സംഗീത. ഷാജി ഗോവിന്ദിന്റെ മരണത്തില്‍ പത്തനംതിട്ട ജില്ലാ സംഗമം, ഒ.ഐ.സി.സി സംഘടനകള്‍ ദുഃഖം രേഖപ്പെടുത്തി.
