തിരുവനന്തപുരം: യുവ സംവിധായിക നയന സൂര്യന്റെ മരണകാരണം പരിക്കുകളല്ലെന്നാണ് ക്രൈംബ്രാഞ്ച്. മയോകാര്ഡിയല് ഇന്ഫ്രാക്ഷനാണ് മരണകാരണമെന്ന് ഇന്ന് ചേര്ന്ന മെഡിക്കല് യോഗത്തില് വിലയിരുത്തല് ഉണ്ടായി. ക്രൈംബ്രാഞ്ചിന്റെ ഇതുവരെയുള്ള അന്വേഷണത്തില് കണ്ടെത്തിയ കാര്യങ്ങള് വിശകലനം ചെയ്യുന്നതിനായി മെഡിക്കല് ബോര്ഡിന്റെ പ്രത്യേക യോഗം ഇന്ന് തിരുവനന്തപുരം മെഡിക്കല് കോളജില് ചേര്ന്നിരുന്നു.
കൊലപാതക സാധ്യതയില്ലെന്നാണ് മെഡിക്കല് ബോര്ഡിന്റെ പ്രാഥമിക വിലയിരുത്തല്. കഴുത്തിനേറ്റ ക്ഷതങ്ങള് മറ്റൊരാളുടെ ബലപ്രയോഗം കൊണ്ട് ഉണ്ടായതല്ലന്നുമാണ് വിലയിരുത്തല്. നയന സൂര്യന്റെ ശരീരത്തിലേറ്റ പരിക്കുകളാണ് മരണ കാരണമെന്നായിരുന്നു ആദ്യ പോസ്റ്റ്മോര്ട്ടം റിപ്പോര്ട്ടില് പറഞ്ഞത്. കഴുത്തിനേറ്റ മുറുകിയ പാടും, അടിവയറ്റനേറ്റ ക്ഷതവുമാണെന്നായിരുന്നു മരണകാരണം. എന്നാല് ഈ രണ്ടുപരിക്കുകളുമല്ല മരണ കാരണം എന്നുളള വിലയിരുത്തലിലാണ് ക്രൈംബ്രാഞ്ച് സംഘം എത്തിയിരിക്കുന്നത്.
