തിരുവനന്തപുരം: യുഎഇ കോണ്സുലേറ്റ് നടത്തിയ നറുക്കെടുപ്പില് സിപിഎം സംസ്ഥാന സെക്രട്ടറി കോടിയേരി ബാലകൃഷ്ണന്റെ മുന് സ്റ്റാഫ് അംഗത്തിനു ഐ ഫോണ് സമ്മാനമായി കിട്ടിയെന്ന് പ്രതിപക്ഷ നേതാവ് രമേശ് ചെന്നിത്തലയുടെ ആരോപണം. 2019 ഡിസംബര് രണ്ടിന് നടന്ന യുഎഇ ദിനാഘോഷത്തിന്റെ ചിത്രങ്ങള് സഹിതമാണ് ചെന്നിത്തല ആരോപണമുന്നയിച്ചത്.
കോടിയേരി ആഭ്യന്തരമന്ത്രിയായിരിക്കെ പേഴ്സണല് സ്റ്റാഫ് അംഗമായിരുന്ന എ.പി.രാജീവന് അടക്കം മൂന്ന് പേര്ക്കാണ് സ്മാര്ട്ട് ഫോണ് സമ്മാനമായി കിട്ടിയതെന്ന് ചെന്നിത്തല ആരോപിച്ചു.
ലക്കി ഡിപ്പ് വഴിയായിരുന്ന സമ്മാനം നല്കിയത്. തന്റെ സ്റ്റാഫില് പെട്ട ഹബീബിന് ലക്കി ഡിപ്പില് വാച്ച് സമ്മാനമായി കിട്ടിയിരുന്നു. കോണ്സുല് ജനറലാണ് ലക്കി ഡിപ്പ് സമ്മാനം കൊടുക്കാന് ആവശ്യപ്പെട്ടതെന്നും ചെന്നിത്തല വാര്ത്താസമ്മേളനത്തില് പറഞ്ഞു.
താന് ഐ ഫോണ് സമ്മാനമായി വാങ്ങിയെന്ന സന്തോഷ് ഈപ്പന്റെ വാദം ശുദ്ധ അസംബന്ധമാണ്. ഒരു ഫോണ് എവിടെയാണെന്ന് ഇപ്പോള് കണ്ടെത്താനായി. ബാക്കി ഫോണുകള് എവിടെയെന്ന് കണ്ടെത്തണം. ഇക്കാര്യം ആവശ്യപ്പെട്ട് ഡിജിപിക്ക് കത്ത് നല്കിയിട്ടുണ്ടെന്നും ചെന്നിത്തല വ്യക്തമാക്കി.
