രാജകുമാരി: ഇടുക്കി ജില്ലയിലെ പശ്‌ചിമഘട്ട മലനിരകളെ നീലപ്പട്ട്‌ അണിയിച്ചുകൊണ്ട് വീണ്ടുമൊരു നീലക്കുറിഞ്ഞി വസന്തത്തിന്റെ ശോഭയിലാണ്‌ ഹൈറേഞ്ച്‌. ശാന്തന്‍പാറ ഗ്രാമപഞ്ചായത്തിലെ കള്ളിപ്പാറ മലനിരകളിലാണ്‌ കണ്ണിനു വിരുന്നായി നീലക്കുറിഞ്ഞി പൂവിട്ടത്‌. തമിഴ്‌നാടുമായി അതിര്‍ത്തി പങ്കിടുന്ന മലനിരകളിലാണ്‌ വ്യാപകമായി കുറിഞ്ഞി പൂത്തിരിക്കുന്നത്‌.
ശാന്തന്‍പാറയില്‍ നിന്നും മൂന്നാര്‍-തേക്കടി സംസ്‌ഥാന പാതയിലൂടെ ആറ്‌ കിലോമീറ്റര്‍ സഞ്ചരിച്ചാല്‍ കള്ളിപ്പാറ എന്ന കൊച്ചുഗ്രാമത്തില്‍ എത്തിച്ചേരാം. ഇവിടെ നിന്നും ഒന്നര കിലോമീറ്റര്‍ മലകയറിയാല്‍ നീലവസന്തത്തിന്റെ മായാജാലം കണ്‍മുന്നില്‍ വിടരും. ഒപ്പം അതിര്‍ത്തി മലനിരകളുടെയും ചതുരംഗപ്പാറ കാറ്റാടിപ്പാറയുടെയും കാഴ്‌ചയും.
2020 -ല്‍ ശാന്തന്‍പാറ ഗ്രാമപഞ്ചായത്തിന്റെ തോണ്ടിമലയിലും വ്യാപകമായി നീലക്കുറിഞ്ഞികള്‍ പൂത്തിരുന്നു. ആരാലും അറിയപ്പെടാതെ അഞ്ച്‌ ഏക്കറിലധികം വ്യാപിച്ചു കിടക്കുന്ന മനോഹര ദൃശ്യം സഞ്ചാരികളെ കാത്തിരിക്കുകയാണ്‌. ഒന്നരകിലോമീറ്ററോളം കാനന പാതയിലൂടെയും പുല്‍മേടുകളിലൂടെയും സഞ്ചരിച്ചാല്‍ നീലവസന്തം നുകരാം. കള്ളിപ്പാറയില്‍ നിന്നും ഓഫ്‌ റോഡ്‌ ജീപ്പ്‌ സഫാരിയും ലഭ്യമാണ്‌.
