27.3 C
Pathanāmthitta
Sunday, May 1, 2022 8:47 am

രണ്ടു വര്‍ഷമായി മുടങ്ങിയിരിക്കുന്ന നെഹ്റു ട്രോഫി വള്ളംകളി ഈ വര്‍ഷം നവംബറില്‍ നടത്തും

ആലപ്പുഴ : രണ്ടു വര്‍ഷമായി മുടങ്ങിയിരിക്കുന്ന നെഹ്റു ട്രോഫി വള്ളംകളി ഈ വര്‍ഷം നവംബറില്‍ നടത്തും. സാധാരണ ഓഗസ്റ്റ് മാസം രണ്ടാം ശനിയാഴ്ച നടത്തിയിരുന്ന ജലമേള വിനോദ സഞ്ചാരികള്‍ കൂടുതല്‍ എത്തുന്ന സീസണ്‍ കണക്കാക്കിയാണ് നവംബറില്‍ നടത്താന്‍ ധാരണയായത്. പുന്നമടയിലെ ഓളപ്പരപ്പില്‍ വള്ളംകളിയുടെ ആരവം നിലച്ചിട്ട് രണ്ടു വര്‍ഷമായി. കോവിഡ് പ്രതിസന്ധിയില്‍ മുsങ്ങിയ വള്ളം കളി ഇത്തവണ നവംബറില്‍ നടത്താനാണ് തീരുമാനം. ചാമ്പ്യന്‍സ് ബോട്ട് ലീഗ് അടക്കമുള്ള മറ്റു കാര്യങ്ങളെ കുറിച്ച്‌ പിന്നീട് തീരുമാനമുണ്ടാകും. അതേസമയം തര്‍ക്കത്തെ തുടര്‍ന്ന് ഫലം മരവിപ്പിച്ചിരുന്ന 2011 നെഹ്റു ട്രോഫി വള്ളംകളിയിലെ ജേതാവിനെ പ്രഖ്യാപിച്ചു. കൈനകരി ഫ്രീഡം ബോട്ട് ക്ലബ് തുഴഞ്ഞ കാരിച്ചാല്‍ ചുണ്ടനാണ് ജേതാവ്. വിജയിയായി ആദ്യം പ്രഖ്യാപിക്കപ്പെട്ട ദേവാസ് ചുണ്ടന്റെ വിജയം ജില്ലാ കലക്ടറും പോലീസ് മേധാവിയും ഉള്‍പ്പെട്ട ജൂറി ഓഫ് അപ്പീല്‍ കമ്മിറ്റി അസ്ഥിരപ്പെടുത്തി. നിയമപ്രകാരമുള്ള യൂണിഫോം ധരിക്കാതെ തുഴഞ്ഞതിനാണ് നടപടി.

ഫൈനലില്‍ മത്സരിച്ച മറ്റ് ചുണ്ടന്‍ വള്ളങ്ങള്‍ നല്‍കിയ പരാതി പരിഗണിച്ചാണ് മത്സരഫലം അസാധുവാക്കിയത്. ഹൈക്കോടതിയിലും കേസുണ്ടായിരുന്നു അമ്പയര്‍മാര്‍, ചീഫ് സ്റ്റാര്‍ട്ടര്‍ എന്നിവരുടെ വിശദീകരണങ്ങളും പരിഗണിച്ചു. കൈനകരി ഫ്രീഡം ബോട്ട് ക്ലബ് തുഴഞ്ഞ കാരിച്ചാല്‍ ചുണ്ടന്റെ ക്യാപ്റ്റന്‍ ജിജി ജേക്കബ് ആയിരുന്നു. പുതിയ ഫലപ്രഖ്യാപനം അനുസരിച്ച്‌ മുട്ടേല്‍ കൈനകരി ചുണ്ടന്‍ രണ്ടാം സ്ഥാനവും, പായിപ്പാട് ചുണ്ടന്‍ മൂന്നാം സ്ഥാനവും നേടി. നെഹ്റു ട്രോഫി ജലമേളയുടെ ചരിത്രത്തില്‍ ആദ്യമായാണ് ജേതാവായ ചുണ്ടന്‍ വള്ളത്തിന്റെ വിജയം അസാധുവാക്കി മറ്റൊരു ചുണ്ടനെ ചാമ്പ്യാനായി പ്രഖ്യാപിക്കുന്നത്.

- Advertisment -
- Advertisment -
Advertisment
- Advertisment -

Most Popular