കൊല്ലം: നവജാത ശിശുവിനെ കരിയിലക്കൂനയില് ഉപേക്ഷിച്ച് കൊന്ന സംഭവത്തില് രേഷ്മയോട് കാമുകനെന്ന പേരില് ഫേസ്ബുക്ക് ചാറ്റ് നടത്തിയിരുന്നത് ആത്മഹത്യ ചെയ്ത യുവതികളെന്ന് പോലീസ്. രേഷ്മയുടെ ബന്ധുക്കളായ ആര്യയും ഗ്രീഷ്മയുമാണ് വ്യാജ അക്കൌണ്ട് ഉണ്ടാക്കി രേഷ്മയെ കബളിപ്പിച്ചതെന്നാണ് പോലീസ് പറയുന്നത്. അനന്തു എന്ന ഫേസ്ബുക്ക് അക്കൌണ്ട് ഉണ്ടാക്കിയാണ് യുവതികള് രേഷ്മയോട് ചാറ്റ് ചെയ്തിരുന്നത്.
ഈ അക്കൌണ്ടില് നിന്ന് രേഷ്മയ്ക്ക് കോളുകളൊന്നും വന്നിരുന്നില്ല. രേഷ്മയെ കബളിപ്പിക്കാനായിരുന്നു ഇരുവരുടേയും ശ്രമം. രേഷ്മയെ കബളിപ്പിക്കുന്ന വിവരം ഗ്രീഷ്മ ഒരു സുഹൃത്തിനോട് വെളിപ്പെടുത്തിയിരുന്നു. ഈ സുഹൃത്താണ് പോലീസിന് ഇതേകുറിച്ചുള്ള വിവരങ്ങള് കൈമാറിയത്. ഇയാളുടെ രഹസ്യമൊഴി പോലീസ് രേഖപ്പെടുത്തും.
കുഞ്ഞിനെ കൊലപ്പെടുത്തിയ കേസില് രേഷ്മ അറസ്റ്റിലായതിന് പിന്നാലെ പോലീസ് ആര്യയെയും ഗ്രീഷ്മയെയും ചോദ്യംചെയ്യാന് വിളിപ്പിച്ചിരുന്നു. ഇതിന് പിന്നാലെയാണ് ഇരുവരെയും ഇത്തിക്കരയാറ്റില് നിന്നും മരിച്ച നിലയില് കണ്ടെത്തിയത്. ചോദ്യം ചെയ്യലിന് ഹാജരാകാന് പോലീസ് നിര്ദേശം ലഭിച്ചതിന് പിന്നാലെ ആര്യ ഭര്തൃസഹോദരിയുടെ മകള് ഗ്രീഷ്മയെയും കൂട്ടി വീട്ടില് നിന്ന് ഇറങ്ങുകയായിരുന്നു. ഞങ്ങള് പോകുകയാണെന്ന് രേഖപ്പെടുത്തിയ കത്തെഴുതി വെച്ചായിരുന്നു പോയത്.
