കൊല്ലം: പരവൂര് ഊഴായിക്കോട്ട് പിഞ്ചുകുഞ്ഞിനെ കരിയില കൂനയില് ഉപേക്ഷിച്ച സംഭവത്തില് യുവതി അറസ്റ്റില്. കുഞ്ഞിനെ ഉപേക്ഷിക്കപ്പെട്ട നിലയില് കണ്ടെത്തിയ പുരയിടത്തിന്റെ ഉടമയുടെ മകള് രേഷ്മ (22) ആണ് അറസ്റ്റിലായത്. കുഞ്ഞ് രേഷ്മയുടേത് ആണെന്ന് പോലീസ് പറഞ്ഞു. ഡിഎന്എ പരിശോധനയിലാണ് കുഞ്ഞ് രേഷ്മയുടേത് തന്നെയാണെന്ന് കണ്ടെത്തിയത്. പ്രസവിച്ചയുടന് കുഞ്ഞിനെ രേഷ്മ ഉപേക്ഷിക്കുകയായിരുന്നു. പ്രസവ വിവരം വീട്ടുകാരില് നിന്നു പോലും രേഷ്മ മറച്ചുവെയ്ക്കുകയായിരുന്നു. കരിയില കൂനയില് ഉപേക്ഷിക്കപ്പെട്ട കുഞ്ഞ് പിറ്റേന്ന് തന്നെ മരിച്ചിരുന്നു.
ക്ഷേത്രത്തിനു സമീപമുള്ള വീടിന്റെ പറമ്പിലാണ് കുഞ്ഞിനെ ഉപേക്ഷിക്കപ്പെട്ട നിലയില് കണ്ടെത്തിയത്. ഒരു തോര്ത്ത് മുണ്ട് കൊണ്ടു പോലും മൂടാതെയാണ് പൊക്കിള് കൊടി പോലും മുറിയാത്ത കുഞ്ഞിനെ കരിയില കൂട്ടത്തില് ഉപേക്ഷിച്ചത്. തെളിവുകളൊന്നും അവശേഷിപ്പിക്കാതിരിക്കാനുളള ആസൂത്രിത നീക്കമാണിതെന്ന് പോലീസ് അന്ന് വ്യക്തമാക്കിയിരുന്നു.
കുഞ്ഞിന്റെ കരച്ചില് കേട്ട് വീട്ടുടമ വിവരം പോലീസില് അറിയിക്കുകയായിരുന്നു. ദേഹമാസകലം കരിയിലയും പൊടിയും മുടിയ നിലയിലായിരുന്നു കുഞ്ഞ്. പോലീസെത്തി കുട്ടിയെ കൊല്ലം പാരിപ്പള്ളി മെഡിക്കല് കോളജ് ആശുപത്രിയിലേക്കു മാറ്റി. മൂന്നു കിലോ തൂക്കമുള്ള ആണ്കുഞ്ഞിന്റെ ആരോഗ്യ നില മോശമായതിനെ തുടര്ന്ന് പാരിപ്പള്ളിയില് നിന്ന് തിരുവനന്തപുരം എസ്എടി ആശുപത്രിയിലേക്ക് വിദഗ്ധ ചികില്സയ്ക്കായി മാറ്റി. എന്നാല് ഒരു രാത്രി മുഴുവന് മഞ്ഞേറ്റ് മണ്ണില് കിടന്നത് കുഞ്ഞ് അണുബാധയെ തുടര്ന്ന് മരിക്കുകയായിരുന്നു.
മേഖലയിലെ ആശുപത്രികളിലെല്ലാം പോലീസ് പരിശോധന നടത്തിയിരുന്നു. സംശയമുളള മുന്നൂറിലേറെ പേരില് നിന്ന് മൊഴിയെടുത്തു. കുഞ്ഞ് ഉപേക്ഷിക്കപ്പെട്ട രാത്രി മുഴുവന് മേഖലയില് ഉണ്ടായ ആയിരക്കണക്കിന് മൊബൈല് ഫോണ് സംഭാഷണ രേഖകളും പരിശോധിച്ചു. ശാസ്ത്രീയ അന്വേഷണത്തിന്റെ സാധ്യതകള് പലതും പരീക്ഷിച്ചിട്ടും ക്രൂരത കാട്ടിയവരെ കണ്ടെത്താന് പോലീസിന് കഴിഞ്ഞിരുന്നില്ല എന്നത് അന്ന് വലിയ ചര്ച്ചയായിരുന്നു. ബന്ധുക്കളെ കാത്ത് പിഞ്ചു മൃതശരീരം ദിവസങ്ങളോളം ആശുപത്രി മോര്ച്ചറിയില് സൂക്ഷിച്ചിരുന്നു. ചാത്തന്നൂര് എസിപിയുടെ നേതൃത്വത്തിലുളള പ്രത്യേക ടീം എട്ട് ചെറുസംഘങ്ങളായി തിരിഞ്ഞാണ് അന്വേഷണം നടത്തിയത്.
