പാരീസ്: യൂറോപ്യൻ പര്യടനത്തിന്റെ ഭാഗമായി ഫ്രാൻസിലെത്തിയ പ്രധാനമന്ത്രി നരേന്ദ്ര മോദിയും ഫ്രഞ്ച് പ്രസിഡന്റ് ഇമ്മാനുവൽ മാക്രോണും നീസിൽ കൂടിക്കാഴ്ച നടത്തി. ഇരുരാജ്യങ്ങളും തമ്മിലുള്ള വ്യാപാര പങ്കാളിത്തം അടുത്ത അഞ്ച് വർഷത്തിനുള്ളിൽ ഇരട്ടിയാക്കുന്നതിനും പ്രതിരോധം, ശാസ്ത്രം, സാങ്കേതികവിദ്യ തുടങ്ങിയ മേഖലകളിലെ സഹകരണം ശക്തിപ്പെടുത്തുന്നതിനുമായി ഉന്നതതല സംവിധാനം രൂപീകരിക്കാൻ ധാരണയായി. ‘ഭാരത് ഇന്നൊവേറ്റ്സ്’ കോൺക്ലേവ് ഇരുനേതാക്കളും ചേർന്ന് ഉദ്ഘാടനം ചെയ്തു.
ഡിജിറ്റൽ ഇടപാടുകൾക്കായുള്ള ഇന്ത്യയുടെ യുപിഐ സംവിധാനം ഫ്രാൻസിൽ കൂടുതൽ വ്യാപിപ്പിക്കുന്നതിനെ ഇരുരാജ്യങ്ങളും സ്വാഗതം ചെയ്തു. നൂതന സാങ്കേതിക മേഖലകളിൽ 19 പുതിയ കരാറുകൾക്ക് ഒപ്പുവെച്ചതോടൊപ്പം ഇന്ത്യൻ പൗരന്മാർക്കായി ഫ്രഞ്ച് വിമാനത്താവളങ്ങളിൽ അതിവേഗ വീസ രഹിത ട്രാൻസിറ്റ് സൗകര്യം ഏർപ്പെടുത്തിയതിന് പ്രധാനമന്ത്രി മോദി ഫ്രാൻസിന് നന്ദി അറിയിച്ചു.
