ന്യൂഡല്ഹി: ജനിതക മാറ്റം വന്ന കോവിഡ് വൈറസ് രാജ്യത്ത് ആശങ്കയേറ്റുകയാണ്. അതിനിടെ പേടിപ്പിക്കുന്ന റിപ്പോര്ട്ടുകളാണ് പുറത്തു വരുന്നത്. ബ്രിട്ടണില് നിന്ന് ഇന്ത്യയിലേക്ക് മടങ്ങിയെത്തിയ നൂറുകണക്കിന് പേര് തെറ്റായ വിലാസം നല്കി മുങ്ങിയെന്നാണ് റിപ്പോര്ട്ടുകള്. ഇവരെ കണ്ടെത്താനുള്ള അന്വേഷണം ഊര്ജിതമായി നടക്കുകയാണ്.
ഒരു മാസത്തിനിടെ വന്നവരെയെല്ലാം പരിശോധിക്കാനായിരുന്നു കേന്ദ്രസര്ക്കാരിന്റെ നിര്ദ്ദേശം. നവംബര് 25 മുതല് ഡിസംബര് 23വരെ ബ്രിട്ടണില് നിന്ന് 33000 ഇന്ത്യക്കാര് തിരികെയെത്തിയെന്നാണ് കണക്ക്. ജനിതകമാറ്റം വന്ന കൊവിഡ് വൈറസ് ഭീതിപരത്തിയതോടെ ഒരുമാസത്തിനിടെ എത്തിയവര്ക്കെല്ലാം ആര്ടിപിസിആര് പരിശോധന നടത്താന് നിര്ദ്ദേശിക്കുകയായിരുന്നു. തുടര്ന്ന് ഇവരെ അന്വേഷിച്ച് പോയപ്പോഴാണ് പലരുടേയും വിലാസം തെറ്റാണെന്ന് തെളിഞ്ഞത്.
വീടുകളിലേക്ക് മടങ്ങിയ നൂറ് കണക്കിന് പേര് തെറ്റായ മേല്വിലാസമാണ് വിമാനത്താവളങ്ങളിലെ ആരോഗ്യ ഡെസ്കില് നല്കിയത്. ഒളിവില് പോയവരെ എല്ലാം ഉടന് കണ്ടെത്തുമെന്ന് മഹാരാഷ്ട്രാ ആരോഗ്യമന്ത്രി വ്യക്തമാക്കി. ബ്രിട്ടണില് നിന്നും മിഡില് ഈസ്റ്റില് നിന്നുമുള്ള യാത്രക്കാര്ക്ക് നിര്ബന്ധിത ഇന്സ്റ്റിറ്റ്യൂഷണല് ക്വാറന്റീന് ആദ്യം നടപ്പാക്കിയ സംസ്ഥാനമാണ് മഹാരാഷ്ട്ര.
