ന്യൂഡല്ഹി : വാക്സിനേഷന് സെന്ററുകളുടെ പ്രവര്ത്തന സമയത്തെ കുറിച്ച് സംസ്ഥാനങ്ങള്ക്കും കേന്ദ്രഭരണ പ്രദേശങ്ങള്ക്കും പുതിയ നിര്ദ്ദേശം നല്കി കേന്ദ്രസര്ക്കാര്. കൊറോണ മൂന്നാം തരംഗം വ്യാപിക്കുന്നതിനിടെ വാക്സിനേഷന് വേഗത്തിലാക്കണമെന്ന് അഭിപ്രായപ്പെട്ട് ആരോഗ്യ വിദഗ്ധര് എത്തിയിരുന്നു. കേന്ദ്രസര്ക്കാരും സമാനമായ നിലപാട് സ്വീകരിച്ചിരുന്നു. ഇതിന്റെ അടിസ്ഥാനത്തിലാണ് വാക്സിനേഷന് സെന്ററുകളുടെ സമയം കൂട്ടാന് നിര്ദ്ദേശം നല്കിയിരിക്കുന്നത്.
രാജ്യത്ത് വാക്സിനേഷന് 150 കോടി പിന്നിട്ടിരിക്കുകയാണ്. കൊറോണയുടെ പുതിയ വകഭേഗം ഒമിക്രോണ് വ്യാപിക്കുന്ന പശ്ചാത്തലത്തില് രോഗികളുടെ എണ്ണവും വര്ദ്ധിക്കുകയാണ്. ഇന്ന് 1,79,723 പേര്ക്കാണ് രാജ്യത്ത് രോഗം സ്ഥിരീകരിച്ചത്. ഇതോടെ രാജ്യത്തെ ആകെ രോഗികളുടെ എണ്ണം 3,57,07,727 ആയി. ഒമിക്രോണ് ബാധിതരുടെ എണ്ണം 4033 ആയി ഉയര്ന്നിട്ടുണ്ട്.
