തൊടുപുഴ : പോലീസ് സ്റ്റേഷനിൽ നിന്ന് ലഭിച്ച സേവനം എങ്ങനെയുണ്ടായിരുന്നു? പോലീസുകാരുടെ പെരുമാറ്റം തൃപ്തികരമായിരുന്നോ? ഇനി പൊതുജനങ്ങൾക്ക് ഇത് പരസ്യമായി വിലയിരുത്താം. സ്റ്റേഷനുകളിലെ സേവന മികവ് അളക്കാൻ ഇടുക്കി ജില്ലയിലെ പോലീസ് സ്റ്റേഷനുകളിൽ ക്യൂ.ആർ. കോഡ് സംവിധാനം ഏർപ്പെടുത്തി. സംസ്ഥാനത്ത് തന്നെ ആദ്യമായാണ് ഇത്തരമൊരു പരീക്ഷണം. മുമ്പ് പോലീസിന്റെ ഔദ്യോഗിക മൊബൈൽ ആപ്പായ ‘പോൽ ആപ്പ്’ വഴി സ്റ്റേഷനുകളെ വിലയിരുത്താൻ അവസരമുണ്ടായിരുന്നെങ്കിലും പൊതുജനങ്ങളിൽ നിന്ന് കാര്യമായ പ്രതികരണം ലഭിച്ചിരുന്നില്ല. ഇതിനൊരു പരിഹാരമായാണ് സ്റ്റേഷനുകളുടെ ഭിത്തികളിൽ തന്നെ ക്യൂ.ആർ. കോഡ് പതിപ്പിക്കാൻ പോലീസ് തീരുമാനിച്ചത്.
ഡിവൈ.എസ്.പി. ഓഫീസുകൾ ഉൾപ്പെടെ ഇടുക്കി ജില്ലയിലെ എല്ലാ പോലീസ് സ്റ്റേഷനുകളിലും ക്യൂ.ആർ. കോഡ് പതിപ്പിച്ചു. ലഭിച്ച സേവനത്തിന്റെ നിലവാരം, ഉദ്യോഗസ്ഥരുടെ പെരുമാറ്റം എന്നിവ രേഖപ്പെടുത്തുന്നതിന്റെ അടിസ്ഥാനത്തിൽ ഓരോ സ്റ്റേഷനും സ്റ്റാർ റേറ്റിങ് ലഭിക്കും.
