ബെംഗളൂരു: രാജ്യത്തിന്റെ അഭിമാന ബഹിരാകാശ ഗവേഷണ സ്ഥാപനമായ ഐഎസ്ആർഒയിൽ (ISRO) നിന്ന് ശാസ്ത്രജ്ഞർ കൂട്ടത്തോടെ രാജിവെക്കുന്നതായി റിപ്പോർട്ട്. ഗഗൻയാൻ ഉൾപ്പെടെയുള്ള വൻകിട ദൗത്യങ്ങളിൽ നിർണായക പങ്കുവഹിച്ച പ്രമുഖർ അടക്കം കഴിഞ്ഞ ഏതാനും മാസങ്ങൾക്കിടെ നൂറ്റിയിരുപതോളം ശാസ്ത്രജ്ഞരാണ് ജോലി ഉപേക്ഷിച്ചത്. പ്രതിസന്ധി രൂക്ഷമായതോടെ ശാസ്ത്രജ്ഞരുടെ രാജി സ്വീകരിക്കുന്നതിൽ കടുത്ത നിബന്ധനകളുമായി കേന്ദ്ര ബഹിരാകാശ വകുപ്പ് പുതിയ ഉത്തരവിറക്കി.
ഗഗൻയാൻ ദൗത്യത്തിലടക്കം പങ്കാളികളായ ശാസ്ത്രജ്ഞരാണ് വിആർഎസ് എടുക്കുകയോ രാജിവെക്കുകയോ ചെയ്തിട്ടുള്ളതെന്നാണ് റിപ്പോർട്ടിലുള്ളത്. ബെംഗളൂരുവിലെ യു ആർ റാവു സാറ്റലൈറ്റ് സെന്ററിൽനിന്ന് മാത്രം 80-ഓളം പേരാണ് ജോലിവിട്ടത്. വി എസ് എസ് സിയിൽനിന്ന് 20-ഓളം പേരും ജോലിയിൽനിന്ന് രാജിവെച്ചു. മാസങ്ങൾക്കിടെ 120 ശാസ്ത്രജ്ഞരെങ്കിലും ജോലി വിട്ടതായും ഒരുപക്ഷേ ഇനിയും കൂടുതൽപേർ ജോലി വിട്ടേക്കാമെന്നും റിപ്പോർട്ടിലുണ്ട്.
