കൊച്ചി: കടയുടമയുടെ നിർദ്ദേശപ്രകാരമെന്ന് വിശ്വസിപ്പിച്ച് സ്ഥാപനത്തിലെത്തിയ മാസ്ക് ധരിച്ച അജ്ഞാതൻ സെയിൽസ് ഗേളിനെ കബളിപ്പിച്ച് 6,000 രൂപ തട്ടിയെടുത്തു. വൈറ്റില ജംഗഷന് സമീപമുള്ള ഒരു കടയിലാണ് കഴിഞ്ഞ ദിവസം ഈ തട്ടിപ്പ് അരങ്ങേറിയത്. വൈകിട്ട് മൂന്നരയോടെയായിരുന്നു സംഭവം. തട്ടിപ്പിന് അരമണിക്കൂർ മുമ്പ് സ്ഥാപനത്തിലെത്തിയ മധ്യവയസ്കൻ കടയുടമയെ അന്വേഷിച്ചിരുന്നു. പിന്നീട് ഫോണിൽ സംസാരിച്ചുകൊണ്ട് കടയിലേക്ക് തിരിച്ചെത്തിയ ഇയാൾ മറുതലയ്ക്കലുള്ളത് കടയുടമയാണെന്ന് ജീവനക്കാരിയെ വിശ്വസിപ്പിച്ചു. തുടർന്ന് കൗണ്ടറിലുണ്ടായിരുന്ന പണവും രേഖകളും എടുത്തുനൽകാൻ ആവശ്യപ്പെടുകയായിരുന്നു. തട്ടിപ്പാണെന്ന് മനസിലാകാതെ ജീവനക്കാരി അതനുസരിക്കുകയും ചെയ്തു.
പണം എണ്ണാൻ തുടങ്ങിയപ്പോൾ എണ്ണണ്ട, എണ്ണിക്കോളാം എന്ന് ഇയാൾ പറയുന്നതും പണം വാങ്ങി ഉടൻതന്നെ സ്ഥലം വിടുന്നതും സിസിടിവി ദൃശ്യങ്ങളിൽ വ്യക്തമാണ്. ജോലിക്ക് കയറി ഏതാനും ദിവസങ്ങൾ മാത്രമായ ജീവനക്കാരിയുടെ പരിചയക്കുറവ് തട്ടിപ്പിന് അനുകൂലമായിമാറി. പണം കൊടുത്തതിന് പിന്നാലെ വിവരം കടയുടമയെ വിളിച്ചറിയിച്ചപ്പോഴാണ് തട്ടിപ്പാണ് നടന്നതെന്ന് ജീവനക്കാരിക്ക് മനസിലായത്.
