തൃശ്ശൂർ: തിരുവില്വാമല ടൗണിലെ വളം ഡിപ്പോയിൽ പകൽവെളിച്ചത്തിൽ വൻ കവർച്ച. ശനിയാഴ്ച രാവിലെ കട തുറന്നയുടൻ പുൽനാശിനി വാങ്ങാനെന്ന വ്യാജേനയെത്തിയ ആൾ വ്യാപാരിയുടെ ഒരു ലക്ഷം രൂപ കവരുകയായിരുന്നു. മേശപ്പുറത്തിരുന്ന ബാഗിൽ സൂക്ഷിച്ചിരുന്ന പണമാണ് നഷ്ടപ്പെട്ടത്. ബൈക്കിലെത്തിയ അപരിചിതനാണ് മോഷണം നടത്തിയതെന്നാണ് പ്രാഥമിക നിഗമനം. രാവിലെ കട തുറന്നയുടൻ പുൽനാശിനി ആവശ്യപ്പെട്ട് ഒരാൾ കടയിലേക്ക് എത്തിയിരുന്നു. വ്യാപാരിയുടെ ശ്രദ്ധ തിരിച്ച് മേശപ്പുറത്തിരുന്ന ബാഗിൽ നിന്നും ഇയാൾ പണം തട്ടിയെടുക്കുകയായിരുന്നു എന്നാണ് പോലീസിന്റെ നിഗമനം. വ്യാപാരി വിവരമറിയിച്ചതിനെ തുടർന്ന് പഴയന്നൂർ പോലീസ് സ്ഥലത്തെത്തി കേസെടുത്ത് ഊർജ്ജിതമായ അന്വേഷണം ആരംഭിച്ചിട്ടുണ്ട്.
പ്രദേശത്തെയും കടയിലെയും സി.സി.ടി.വി. ദൃശ്യങ്ങൾ കേന്ദ്രീകരിച്ചാണ് പോലീസ് അന്വേഷണം പുരോഗമിക്കുന്നത്. പകൽവെളിച്ചത്തിൽ ടൗണിന് സമീപം നടന്ന മോഷണം നാട്ടിലെ വ്യാപാരികൾക്കിടയിൽ വലിയ ആശങ്കയ്ക്ക് കാരണമായിട്ടുണ്ട്.
