ദുബായ് : സാമൂഹിക മാധ്യമമായ X-നെ ഒരു സമ്പൂർണ സേവന ആപ്പായി മാറ്റുന്നതിന്റെ ഭാഗമായി, യുഎസിലെ പ്രീമിയം, പ്രീമിയം+ വരിക്കാർക്കായി പുതിയ ബാങ്കിങ് സേവനങ്ങൾ അവതരിപ്പിച്ചു. ഭാവിയിൽ ഈ സേവനം യുഎസിന് പുറമെ മറ്റ് രാജ്യങ്ങളിലേക്കും വ്യാപിപ്പിച്ചേക്കും. ചൈനീസ് ആപ്പായ വീചാറ്റിന്റെ മാതൃകയിൽ X-നെ മാറ്റുകയെന്ന ഇലോൺ മസ്കിന്റെ ദീർഘകാല ലക്ഷ്യത്തിലേക്കുള്ള സുപ്രധാന ചുവടുവെപ്പാണിത്. സന്ദേശമയയ്ക്കലിനു പുറമേ ഷോപ്പിങ്, പണമിടപാടുകൾ എന്നിവയെല്ലാം ഒരു പ്ലാറ്റ്ഫോമിൽ ലഭ്യമാക്കുകയാണ് ഇതിലൂടെ ലക്ഷ്യമിടുന്നത്.
നിക്ഷേപങ്ങൾ കൈകാര്യം ചെയ്യാനും, വ്യക്തികൾ തമ്മിൽ പണം കൈമാറാനും, ബില്ലുകൾ അടയ്ക്കാനും, വയർ ട്രാൻസ്ഫർ വഴി പണം അയക്കാനും, മെയിൽ ചെക്ക് ചെയ്യാനും X മണി ഉപയോക്താക്കൾക്ക് സാധിക്കും. നിക്ഷേപങ്ങൾ ന്യൂജേഴ്സി ആസ്ഥാനമായുള്ള വായ്പാ ദാതാവായ ക്രോസ് റിവർ ബാങ്കിലാവും സൂക്ഷിക്കുക. ഫെഡറൽ ഡെപ്പോസിറ്റ് ഇൻഷുറൻസ് കോർപ്പറേഷൻ വഴി 250,000 ഡോളർ വരെയുള്ള ഇൻഷുറൻസും ലഭ്യമാക്കും. ചൈനയുടെ വീചാറ്റ് പോലെ X-നെ മാറ്റാനാണ് താൻ ആഗ്രഹിക്കുന്നതെന്ന് മസ്ക് വർഷങ്ങളായി പറയുന്നതാണ്. ഇതിലേക്കുള്ള സുപ്രധാന ചുവടുവെപ്പാണിത്.
സന്ദേശമയക്കൽ, ഷോപ്പിങ്, പണമടയ്ക്കൽ എന്നിവയ്ക്കായുള്ള ആപ്ലിക്കേഷനായ വീചാറ്റ് ചൈനയിൽ വ്യാപകമായി പ്രചാരത്തിലുള്ളതാണ്. നിക്ഷേപങ്ങൾക്ക് പ്രതിവർഷം ആറ് ശതമാനം വരെ പലിശ നൽകുമെന്ന് X മണി വാഗ്ദാനം ചെയ്യുന്നു. യുഎസിലെ ബാങ്കിങ് നിരക്കുകളെക്കാൾ ഉയർന്നതാണിത്. പ്രീമിയം+ സബ്സ്ക്രൈബർമാർക്ക് ഉയർന്ന നിരക്ക് ലഭിക്കും എന്നാൽ അവർ ഡയറക്ട് ഡെപ്പോസിറ്റ് ആവശ്യകതകൾ നിറവേറ്റേണ്ടതുണ്ട്. സോഷ്യൽ നെറ്റ്വർക്ക് വാഗ്ദാനം ചെയ്യുന്ന യു.എസിലെ ഇൻഷുറൻസ് ബാങ്കിങ് സേവനങ്ങളാണിത്.
