ന്യൂഡൽഹി: ഹിന്ദുരാഷ്ട്രം എന്ന ആശയത്തെ ആരും ഭയപ്പെടേണ്ടതില്ലെന്നും രാജ്യത്തെ ന്യൂനപക്ഷങ്ങൾക്ക് ഇവിടെ യാതൊരുവിധ ഭീഷണിയുമില്ലെന്നും യോഗ ഗുരു ബാബാ രാംദേവ്. വ്യത്യസ്ത മതവിശ്വാസങ്ങൾ വെച്ചുപുലർത്തുമ്പോഴും ഇന്ത്യക്കാരുടെയെല്ലാം പൂർവികർ ഒന്നാണെന്ന് അദ്ദേഹം ഓർമ്മിപ്പിച്ചു. 2009-ൽ ഉത്തർപ്രദേശിലെ പ്രശസ്തമായ മുസ്ലിം സെമിനാരിയായ ദിയോബന്ദ് സന്ദർശിച്ചപ്പോഴുണ്ടായ അനുഭവങ്ങൾ പങ്കുവെക്കവെയായിരുന്നു ബാബാ രാംദേവിന്റെ പരാമർശം. ‘‘നമ്മുടെ മതങ്ങൾ വ്യത്യസ്തമായിരിക്കാം, പക്ഷേ പൂർവികർ ഒന്നാണ്. ഹിന്ദുരാഷ്ട്രം എന്ന സങ്കൽപ്പത്തെ ആരും ഭയപ്പെടേണ്ടതില്ല. ഹിന്ദുരാഷ്ട്രം സ്ഥാപിതമായാൽ മുസ്ലിംകൾ എങ്ങോട്ട് പോകും എന്ന് ചിലർ ചോദിക്കുന്നുണ്ട്.
നിങ്ങളുടെ പൂർവികരുടെ പാരമ്പര്യം നിങ്ങൾ നെഞ്ചിലേറ്റുക. നിങ്ങൾക്ക് താടി വളർത്തുകയോ ക്ഷൗരം ചെയ്യുകയോ ചെയ്യാം. ഇഷ്ടമുള്ള വസ്ത്രം ധരിക്കാം. എന്നാൽ പൂർവികരെപ്പോലെയുള്ള സ്വഭാവശുദ്ധി നിലനിർത്തുക. ഹിന്ദുസ്ഥാനിൽ മുസ്ലിംകൾക്കോ ക്രിസ്ത്യാനികൾക്കോ യാതൊരു അപകടവുമില്ല’’ – രാംദേവ് പറഞ്ഞു.
