തിരുവനന്തപുരം : വാർത്ത ചോർത്തൽ കണ്ടെത്താൻ സിപിഎം ജില്ലാ സെക്രട്ടേറിയറ്റ് അംഗങ്ങളുടെ ഫോൺ കോൾ വിശദാംശങ്ങൾ ശേഖരിക്കാൻ ജില്ലാനേതൃത്വം ശ്രമം നടത്തിയെന്നു വിവാദം. ഫോൺ കോൾ വിശദാംശങ്ങൾ മൊബൈൽ സേവനദാതാവിൽനിന്നു ശേഖരിക്കാൻ സെക്രട്ടേറിയറ്റ് അംഗങ്ങളിൽനിന്ന് ഒപ്പിട്ട ഫോം ശേഖരിക്കാൻ ശ്രമിച്ചെന്ന ആക്ഷേപമാണു വിവാദമായത്. അതേസമയം, ജില്ലാ സെക്രട്ടറി വി.ജോയിയും സംസ്ഥാന സെക്രട്ടറി എം.വി.ഗോവിന്ദനും ആരോപണം നിഷേധിച്ചു. ജില്ലാ സെക്രട്ടറി വി.ജോയിക്കെതിരെ ഒരു ആരോപണം ഒരുമാസം മുൻപു ചേർന്ന ജില്ലാ സെക്രട്ടേറിയറ്റിൽ ഉയർന്നിരുന്നു. ഇതു തൊട്ടടുത്ത ദിവസം ചില ഓൺലൈൻ മാധ്യമങ്ങളിൽ വാർത്തയായി.
അടുത്ത ജില്ലാ സെക്രട്ടേറിയറ്റ് യോഗത്തിൽ ഇതേക്കുറിച്ചു വികാരാധീനനായി സംസാരിച്ച ജില്ലാ സെക്രട്ടറി, ഇത്തരത്തിൽ വാർത്ത ചോർത്തിയതു യോഗത്തിൽ പങ്കെടുത്തവരാണെന്ന നിലപാടെടുത്തു. തുടർന്നാണ് അംഗങ്ങളുടെ ഫോൺ കോൾ വിശദാംശം ശേഖരിക്കാൻ അവർക്കു സമ്മതമാണെന്ന ഫോം ഒപ്പിട്ടു വാങ്ങിയതെന്നു പറയുന്നു. ചില അംഗങ്ങൾ ഇതിനു തയാറാകാതെ നിർദേശത്തെ ചോദ്യം ചെയ്തെന്ന വിവരവും പുറത്തുവന്നു.
