തിരുവനന്തപുരം : നെയ്യാറ്റിന്‍കരയില്‍ തര്‍ക്കഭൂമിയില്‍ നിന്നും കുടിയൊഴിപ്പിക്കുന്നതിനിടെ ജീവനൊടുക്കിയ ദമ്പതികളുടെ മക്കള്‍ക്ക് 10 ലക്ഷം രൂപ സഹായധനം നല്‍കാന്‍ ഇന്നത്തെ മന്ത്രിസഭാ യോഗം തീരുമാനിച്ചു. സാമൂഹ്യക്ഷേമ വകുപ്പ് മന്ത്രി കെ.കെ ശൈലജയാണ് ഈ വിവരം അറിയിച്ചത്. കുട്ടികള്‍ക്ക് വീട്‌വെച്ചു നല്‍കുമെന്നും കുട്ടികളുടെ വിദ്യാഭ്യാസം സാമൂഹ്യക്ഷേമ വകുപ്പ് ഏ‌റ്റെടുത്ത് നടത്തുമെന്നും ശൈലജ അറിയിച്ചു.
മാതാപിതാക്കളുടെ മരണത്തെ തുടര്‍ന്ന് അനാഥരായ മക്കള്‍ക്ക് വീടുവവെച്ചു നല്‍കാനും വിദ്യാഭ്യാസ ചെലവ് ഏറ്റെടുക്കാനും നിര്‍ദേശം നല്‍കിയതായി മുഖ്യമന്ത്രി പിണറായി വിജയന്‍ നേരത്തെ പ്രഖ്യാപിച്ചിരുന്നു. മരിച്ച ദമ്പതികളുടെ മക്കള്‍ക്ക് വീട് വെച്ച്‌ നല്‍കാന്‍ കളക്ടര്‍ ഇന്നലെ സര്‍ക്കാരിന് നല്‍കിയ റിപ്പോര്‍‌ട്ടില്‍ ശിപാര്‍ശ ചെയ്‌തിരുന്നു. നഗരസഭയുടെ ഫ്ലാറ്റോ അല്ലെങ്കില്‍ ലൈഫ് മിഷനില്‍ ഉള്‍പ്പെടുത്തി വീടും സ്ഥലവും നല്‍കാനോ ആണ് കളക്‌ടറുടെ ശിപാര്‍ശ. അതേസമയം സംഭവത്തില്‍ പോലീസിന് വീഴ്‌ച പറ്റിയോ എന്ന് വ്യക്തമാക്കാന്‍ അന്വേഷണം തുടങ്ങി. നെയ്യാ‌റ്റിന്‍കര ഡി.വൈ.എസ്.പിക്കാണ് അന്വേഷണ ചുമതല.
