നെയ്യാറ്റിന്‍കര: കൊറോണ ബാധിച്ച്‌ മരണമടഞ്ഞ വിശ്വാസിയുടെ മൃതദേഹം സെമിത്തേരിയില്‍ സംസ്‌ക്കരിക്കുന്നത് ഒഴിവാക്കാന്‍ പൊതുശ്മശാനത്തില്‍ ദഹിപ്പിക്കുന്നതിനുളള അനുവാദം നല്‍കി നെയ്യാറ്റിന്‍കര രൂപത.
നെയ്യാറ്റിന്‍കര രൂപതയിലെ വഴുതൂര്‍ കര്‍മലമാതാ ദേവാലയ അംഗം പെരുമ്പഴുതൂര്‍ വടകോട് സ്വദേശി ക്ലീറ്റസ് (71) ന്റെ മൃതദേഹമാണ് തിരുവനന്തപുരം ശാന്തികവാടത്തില്‍ ഇന്നലെ വൈകിട്ട് 3.30നു ദഹിപ്പിച്ചത്. ആഗോള കത്തോലിക്കാ സഭയുടെ മാനദണ്ഡങ്ങള്‍ പാലിച്ചാണ് മൃതസംസ്‌കാര കര്‍മങ്ങള്‍ നിര്‍വ്വഹിച്ചത്.
നെയ്യാറ്റിന്‍കര ബിഷപ്പ് ഡോ. വിന്‍സെന്റ് സാമുവലാണ് മൃതദേഹം ശാന്തികവാടത്തില്‍ ദഹിപ്പിക്കാമെന്ന് ബന്ധുക്കളെ അറിയിച്ചത്. നെഞ്ചുവേദനയെ തുടര്‍ന്ന് ആശുപത്രിയില്‍ പ്രവേശിപ്പിച്ച ക്ലീറ്റസ് ശനിയാഴ്ച പുലര്‍ച്ചെ 1.40 നാണ് മരിച്ചത്.
