കൊച്ചി: ചാര്ട്ടേഡ് അക്കൗണ്ട് പി. വേണുഗോപാല് പണമൊന്നും ഇല്ലെന്നുകണ്ട് ക്ളോസ് ചെയ്യാന് സ്വപ്നയോട് ആവശ്യപ്പെട്ട ജോയിന്റ് ലോക്കറില്നിന്ന് പിന്നീട് എന്.ഐ.എ പിടിച്ചെടുത്തത് 64 ലക്ഷം രൂപയും 982.5 ഗ്രാം സ്വര്ണവും. ഇ.ഡി കോടതിയില് സമര്പ്പിച്ച കുറ്റപത്രത്തിലാണ് ഇക്കാര്യം വ്യക്തമാക്കുന്നത്. എം. ശിവശങ്കര് പരിചയപ്പെടുത്തിയത് അനുസരിച്ചാണ് സ്വപ്നക്ക് താന്കൂടി ചേര്ന്ന് ജോയിന്റ് ലോക്കര് എസ്.ബി.ഐ തിരുവനന്തപുരം സിറ്റി ബ്രാഞ്ചില് തുറന്നതെന്ന് വേണുഗോപാല് മൊഴി നല്കിയിരുന്നു.
ലോക്കര് തുറക്കുന്നതിന് തലേ ദിവസം വേണുഗോപാലിന്റെ വീട്ടില് സ്വപ്ന 30 ലക്ഷം അതില് സൂക്ഷിക്കാന് കൈമാറി. പിന്നീട് മൂന്നുനാല് പ്രാവശ്യം പണമെടുത്ത് സ്വപ്നക്ക് കൈമാറി. ലോക്കര് കാലിയായപ്പോള് അത് ക്ളോസ് ചെയ്യാന് ആവശ്യപ്പെട്ടപ്പോള് അതില് കുറച്ച് സ്വര്ണം സൂക്ഷിക്കാമെന്നായി സ്വപ്ന. തുടര്ന്ന് താക്കോല് കൈമാറിയെന്നും വേണുഗോപാല് ഇ.ഡിക്ക് മൊഴി നല്കി. ഇതേ ലോക്കറില് നിന്നാണ് സ്വര്ണക്കടത്ത് പിടിക്കപ്പെട്ടശേഷം എന്.ഐ.എ നടത്തിയ അന്വേഷണത്തില് വന്തുകയും സ്വര്ണവും പിടിച്ചെടുത്തത്.