തിരുവനന്തപുരം: കായംകുളത്തെ എസ്.എഫ്.ഐ നേതാവ് നിഖില് തോമസിന്റെ വ്യാജ ബിരുദ സര്ട്ടിഫിക്കറ്റ് വിവാദത്തില് നിര്ണായക വെളിപ്പെടുത്തലുമായി കേരള സര്വകലാശാല വിസി മോഹന് കുന്നമ്മല്. നിഖില് തോമസ് 2017 മുതല് 2020 വരെ മൂന്ന് വര്ഷവും കായംകുളം എംഎസ്എം കോളേജില് പഠിച്ചിരുന്നുവെന്നും പരീക്ഷയെഴുതിയിരുന്നുവെന്നും മോഹന് കുന്നുമ്മല് വ്യക്തമാക്കി. നിഖിലിന്റെ ഡിഗ്രി സര്ട്ടിഫിക്കറ്റ് പരിശോധിക്കാന് രജിസ്ട്രാറോട് ആവശ്യപ്പെട്ടിട്ടുണ്ട്. റായ്പൂരിലും കായംകുളത്തും എങ്ങനെ ഒരേ സമയം പഠിച്ചുവെന്നതില് സംശയങ്ങളുണ്ട്. അദ്ദേഹം കേരള സര്വകലാശാലയില് പരീക്ഷയെഴുതണമെങ്കില് ഇവിടെ അറ്റന്റന്സ് വേണം. അദ്ദേഹത്തിന് ഇന്റേണല് മാര്ക്ക് ലഭിക്കണം. അദ്ദേഹത്തിന് ഇന്റേണല് മാര്ക്ക് ലഭിച്ചിട്ടുണ്ട്. അത് നല്കുന്നത് പഠിപ്പിക്കുന്ന അധ്യാപകരാണ്. അതിനാല് നിഖില് തോമസ് കേരളാ സര്വകലാശാലയില് പഠിച്ചിട്ടുണ്ടെന്നത് വ്യക്തമാണെന്നും അദ്ദേഹം പറഞ്ഞു. ഇത് വ്യാജ സര്ട്ടിഫിക്കറ്റാണെങ്കില് പ്രശ്നം വേഗത്തില് അവസാനിക്കുമെന്നും അദ്ദേഹം പറഞ്ഞു.
അതേസമയം നിഖില് തോമസിന്റെ ബിരുദ സര്ട്ടിഫിക്കറ്റ് യഥാര്ഥമെന്ന് എസ്.എഫ്.ഐ സംസ്ഥാന സെക്രട്ടറി പി.എം. ആര്ഷോ. കായംകുളം കോളജിലെ ഡിഗ്രി കോഴ്സ് റദ്ദാക്കിയിരുന്നുവെന്നും എം.കോം പ്രവേശനത്തില് ക്രമക്കേടില്ലെന്നും ആര്ഷോ മാധ്യമങ്ങളോട് പറഞ്ഞു. അതേസമയം ഹാജര് സംബന്ധിച്ച ആരോപണങ്ങള് എസ്.എഫ്.ഐ പരിശോധിക്കുമെന്നും കലിംഗയില് വിദ്യാര്ഥി ആയിരിക്കെയാണ് നിഖില് കായംകുളം കോളജില് കൗണ്സിലറായതെന്നും ആര്ഷോ വ്യക്തമാക്കി.
