ഡല്ഹി : യെമന്പൗരനെ കൊലപ്പെടുത്തിയ കേസില് യെമനില് വധശിക്ഷയ്ക്ക് വിധിക്കപ്പെട്ട പാലക്കാട് കൊല്ലങ്കോട് സ്വദേശി നിമിഷപ്രിയയുടെ ജീവന് രക്ഷിക്കാന് നയതന്ത്രതലത്തില് ഇടപെടാന് കേന്ദ്രത്തോട് നിര്ദേശിക്കണമെന്ന് ആവശ്യപ്പെട്ട് ഡല്ഹി ഹൈക്കോടതിയില് ഹര്ജി. സേവ് നിമിഷപ്രിയ ഇന്റര്നാഷണല് ആക്ഷന് കൗണ്സിലാണ് ഹര്ജി ഫയല് ചെയ്തിരിക്കുന്നത്. നിമിഷപ്രിയയുടെ വധശിക്ഷ ഒഴിവാക്കുന്നതിന് യെമന് പൗരന്റെ ബന്ധുക്കള്ക്ക് നല്കേണ്ട ബ്ലഡ് മണി കൈമാറാനുള്ള സംവിധാനം ഒരുക്കാന് കേന്ദ്ര സര്ക്കാരിനോട് നിര്ദേശിക്കണമെന്നും ഹര്ജിയില് ആവശ്യപ്പെട്ടിട്ടുണ്ട്.
യെമന് പൗരന് തലാല് അബ്ദുമഹ്ദി 2017-ല് കൊല്ലപ്പെട്ട കേസില് ലഭിച്ച വധശിക്ഷയില് ഇളവു ലഭിക്കണമെന്ന് ആവശ്യപ്പെട്ട് നിമിഷപ്രിയ നല്കിയ ഹര്ജി യമനിലെ അപ്പീല് കോടതി കഴിഞ്ഞ ദിവസമാണ് തള്ളിയത്. അപ്പീല് കോടതി വിധിക്കെതിരെ സുപ്രീംകോടതിയില് അപ്പീല് നല്കാന് സാധിക്കുമെങ്കിലും അതില് വലിയ പ്രതീക്ഷ നിയമവിദഗ്ധര് കാണുന്നില്ല. കൊല്ലപ്പെട്ട യെമന് പൗരന്റെ ബന്ധുക്കള്ക്ക് ബ്ലഡ് മണി നല്കി വധശിക്ഷയില്നിന്ന് ഒഴിവാക്കുക എന്നതാണ് രണ്ടാമത്തെ സാധ്യത.
