കോഴിക്കോട് : നിപ ബാധിച്ച് കേരളത്തില് വീണ്ടും മരണം റിപ്പോര്ട്ട് ചെയ്ത പശ്ചാത്തലത്തില് നിപ ചികിത്സയ്ക്കുള്ള പ്രോട്ടോക്കോള് പുറത്തിറക്കി ആരോഗ്യവകുപ്പ്. നിപ ബാധിതനായി കോഴിക്കോട് കുട്ടി മരിക്കുകയും സമ്പര്ക്ക പട്ടികയിലുള്ള രണ്ട് പേര്ക്ക് രോഗലക്ഷണങ്ങള് കണ്ടെത്തുകയും ചെയ്ത സാഹചര്യത്തിലാണ് നടപടി. നിപ പോസീറ്റിവായി ചികിത്സയിലുള്ള രോഗികള്ക്ക് എല്ലാ ദിവസവും ആര്ടിപിസിആര് ടെസ്റ്റ് നടത്തും.
രോഗി ആരോഗ്യസ്ഥിതി വീണ്ടെടുത്താലോ, രണ്ടു തവണയായി 5 ദിവസത്തെ ഇടവേളയില് ആര്ട്ടിപിസിആര് ഫലം 3 സാംപിളും നെഗറ്റീവ് ആവുകയോ ചെയ്താല് ചികിത്സിക്കുന്ന ഡോക്ടറും മെഡിക്കല് ബോര്ഡും തീരുമാനിച്ചാല് രോഗിയെ ഡിസ്ചാര്ജ് ചെയ്യാം.
ആദ്യഫലം നെഗറ്റീവ് ആയാല് 3 ദിവസം നിരീക്ഷണത്തില് കഴിയണം. തുടര്ന്നും ലക്ഷണങ്ങള് ഇല്ലെങ്കില് പിന്നീട് 21 ദിവസം വീട്ടില് നിരീക്ഷണത്തില് കഴിയണം. ലക്ഷണങ്ങള് ഉള്ളവര്ക്ക് തുടര് പരിശോധനകള് നടത്തും. ഫലം നെഗറ്റീവാകുകയും ലക്ഷണങ്ങള് ഇല്ലാതിരിക്കുകയും ചെയ്താല് പിന്നീട് 3 ദിവസം നിരീക്ഷണത്തില് കഴിയണം.
തുടര്ന്നും ലക്ഷണമില്ലെങ്കില് ഡിസ്ചാര്ജ് ചെയ്യും. ഫലം പോസിറ്റിവ് അല്ലാത്ത, ലക്ഷണം ഉള്ളവര്ക്ക് മറ്റു രോഗം ഉണ്ടോ എന്ന് കണ്ടെത്താന് വിശദ പരിശോധന നടത്താനും പ്രോട്ടോക്കോളില് ശുപാര്ശ ചെയ്യുന്നു.
