തിരുവല്ല :കായലോളങ്ങളില് മാറ്റുരയ്ക്കാന് പത്തനംതിട്ട ജില്ലക്കാര്ക്ക് സ്വന്തം കരിനാഗം ഒരുങ്ങുന്നു. ജില്ലയുടെ ആദ്യത്തെ ചുണ്ടന് വള്ളമായ നിരണം ചുണ്ടന്റെ പണികള്ക്ക് ആവശ്യമായ അഞ്ഞിലിത്തടി വെട്ടുന്നതിന് മുന്നോടിയായി വൃക്ഷപൂജ നടത്തി. വെള്ളിയാഴ്ച നടന്ന ചടങ്ങുകള്ക്ക് ശാന്തി സോമേഷ് മുഖ്യ കാര്മികത്വം വഹിച്ചു. രക്ഷാധികാരി ഫാ.തോമസ് പുരയ്ക്കല് ആശീര്വദിച്ചു. നിരണത്തിന് സ്വന്തമായ ചുണ്ടന്വള്ളം വേണമെന്ന നാട്ടുകാരുടെ സ്വപ്നം ഇനി പൂവണിയും. പണിക്ക് ആവശ്യമായ നാല് വലിയ ആഞ്ഞിലി മരങ്ങളാണ് പൊന്കുന്നം പ്രദേശത്തുനിന്ന് ലക്ഷങ്ങള് കൊടുത്ത് വാങ്ങിയത്. 100 വര്ഷം പഴക്കമുള്ള 120 ഇഞ്ച് വണ്ണവും, 60 അടി പൊക്കവുമുള്ള പ്രധാന മരത്തിന്റെ ചുവട്ടിലാണ് വൃക്ഷപൂജ നടത്തിയത്.
ബുധനാഴ്ചരാവിലെ ഒമ്പതിന് നിരണം പള്ളിയുടെ മുന്നില് തടിക്ക് സ്വീകരണ പരിപാടി ആരംഭിക്കും. ആദ്യകാല വള്ളംകളി താരങ്ങള് ചേര്ന്ന് തടിക്ക് പൗരസ്വീകരണം നല്കും. ഒരോ കവലകളിലെയും സ്വീകരണങ്ങള് ഏറ്റുവാങ്ങി മാലിപ്പുരയില് എത്തിച്ചേരും. 2023 ലെ നെഹ്റുട്രോഫിയില് പങ്കെടുക്കാന് ലക്ഷ്യമിട്ടാണ് നിര്മാണം. ഒരുകോടിയിലധികം രൂപയാണ് ചെലവ് പ്രതീക്ഷിക്കുന്ന്. 5000 മുതല് അഞ്ചുലക്ഷം വരെയുള്ള ഓഹരികള് വിറ്റാണ് പണം സ്വരൂപിക്കുന്നത്. പ്രവാസിയായ അടിവാക്കല് റെജി പ്രസിഡന്റും, രക്ഷാധികാരി ഫാ. തോമസ് പുരക്കല്, സെക്രട്ടറി അജില് പുരക്കല്, ട്രഷറര് ജോബി ആലപ്പാട്ട് എന്നിവരുടെ നേതൃത്വത്തിലാണ് നിരണം ചുണ്ടന്റെ നിര്മാണ കമ്മിറ്റി പ്രവര്ത്തിക്കുന്നത്. റോബി തോമസ്, റെന്നി തേവേരി, അജില് പുരയ്ക്കല്, രതീഷ് കുമാര്, ജോബി ഡാനിയേല് തുടങ്ങിയവര് വൃക്ഷ പൂജ ചടങ്ങുകള്ക്ക് നേതൃത്വം നല്കി. നിരണം ബോട്ട് ക്ലബാണ് ചുണ്ടന്വള്ളം ഒരുക്കുന്നത്.
