ന്യൂഡല്ഹി: നിര്ഭയ കൂട്ടബലാല്സംഗക്കേസിലെ പ്രതി വിനയ് ശര്മ്മയ്ക്ക് തിഹാര് ജയില് ജയിലില് വെച്ച് വിഷം നല്കിയതായി ആരോപണം. പ്രതികള്ക്ക് ദയാഹര്ജി നല്കാന് ആവശ്യമായ രേഖകള് ജയില് അധികൃതര് നല്കുന്നില്ലെന്നു കാണിച്ച് നല്കിയ ഹര്ജി പരിഗണിക്കവേ ഡല്ഹി പട്യാല ഹൗസ് കോടതിയിലാണ് അഭിഭാഷകന് ഇക്കാര്യം പറഞ്ഞത്. സ്ലോ പോയിസണ് ഏറ്റ വിനയ് ശര്മ്മ ജയില് ആശുപത്രിയില് ചികില്സയിലായിരുന്നുവെന്നും പ്രതിയുടെ അഭിഭാഷകനായ എ പി സിംഗ് കോടതിയില് പറഞ്ഞു.
വിനയ് ശര്മ്മയുടെ ആരോഗ്യസ്ഥിതി മോശം അവസ്ഥയിലാണ്. അദ്ദേഹം ഭക്ഷണം കഴിക്കുന്നില്ല. ദയാഹര്ജി പരിഗണിക്കുന്ന രാഷ്ട്രപതി ഇക്കാര്യങ്ങളെല്ലാം പരിഗണിക്കണമെന്നും അഭിഭാഷകന് എ പി സിംഗ് ആവശ്യപ്പെട്ടു. അതേസമയം ദയാഹര്ജി സമര്പ്പിക്കാന് ആവശ്യമായ രേഖകള് എല്ലാം പ്രതികള്ക്ക് നല്കിയതായി പ്രോസിക്യൂഷന് കോടതിയെ അറിയിച്ചു. വധശിക്ഷ നീട്ടിവെക്കാന് പ്രതിഭാഗം തന്ത്രങ്ങള് മെനയുകയാണെന്നും പ്രോസിക്യൂഷന് ആരോപിച്ചു. തിരുത്തല് ഹര്ജി തള്ളിയ സാഹചര്യത്തില് രാഷ്ട്രപതിക്ക് ദയാഹര്ജി നല്കുന്നതിനായി കേസുമായി ബന്ധപ്പെട്ട രേഖകള് ആവശ്യപ്പെട്ടു എന്നാണ് അഭിഭാഷകന് കോടതിയില് ചൂണ്ടിക്കാണിച്ചത്. ആവശ്യമായ രേഖകള് ലഭിക്കുന്നില്ലെന്നും അഭിഭാഷകര് പറഞ്ഞു.
