പത്തനംതിട്ട : പത്തനംതിട്ട ജില്ലയിലെ തദ്ദേശ സ്വയംഭരണ സ്ഥാപനങ്ങളുടെ നേതൃത്വത്തില് രോഗങ്ങള് തടയുവാന് മഴക്കാല പൂര്വ്വ ശുചീകരണ യജ്ഞം തകൃതിയായി നടക്കുമ്പോള് ഗ്രാമ പഞ്ചായത്തുകളുടെ പല ഭാഗങ്ങളിലും കെട്ടികിടക്കുന്ന മാലിന്യങ്ങള് നീക്കം ചെയ്യാന് നടപടിയില്ല. ജില്ലയിലെ 8 ബ്ലോക്ക് പഞ്ചായത്തുകളിലായി 53 ഗ്രാമ പഞ്ചായത്തുകളാണ് ഉള്ളത്. ഈ പഞ്ചായത്തുകളില് എല്ലാം തന്നെ ഹരിത കര്മ്മ സേന വഴിയാണ് മാലിന്യങ്ങള് ശേഖരിക്കുന്നത്. ഈ മാലിന്യങ്ങള് വാര്ഡുകളില് സ്ഥാപിച്ചിരിക്കുന്ന മിനി എം.സി.എഫ് കളില് സൂക്ഷിച്ച ശേഷം നിശ്ചിത സമയത്തിനുള്ളില് ഇത് വലിയ കേന്ദ്രങ്ങളിലേക്ക് മാറ്റുകയും മാലിന്യങ്ങള് തരം തിരിച്ച് സംസ്ഥാന സര്ക്കാരിന്റെ ക്ലീന് കേരള കമ്പനിക്ക് കൈമാറുകയുമാണ് ചെയ്യുന്നത്.
എന്നാല് പലയിടത്തും ഇത് കാര്യക്ഷമമായി നടക്കാതെ വന്നതോടെ ജില്ലയിലെ പല ഭാഗങ്ങളിലും മാലിന്യങ്ങള് കെട്ടിക്കിടന്ന് ഇതില് കൊതുകുകള് വളരുന്ന സാഹചര്യം നില നില്ക്കുന്നു. പല എം.സി.എഫ് കളും കാട് കയറി കിടക്കുന്നു. നിറഞ്ഞു കവിഞ്ഞ എം.സി.എഫ് കളുടെ അടുത്ത് നാട്ടുകാര് മാലിന്യം വലിച്ചെറിയുന പ്രവണതകളുമുണ്ട്. ജനവാസ മേഖലയിലാണ് പലപ്പോഴും ഇത്തരത്തില് മാലിന്യം കൂട്ടിയിട്ടിരിക്കുന്നത്. ചാക്കുകളില് കെട്ടി വെച്ചിരിക്കുന്ന മാലിന്യവും ആരും നീക്കം ചെയ്യുന്നില്ല. ജില്ലയിലെ തദ്ദേശ സ്വയംഭരണ സ്ഥാപനങ്ങള് ആരും തന്നെ ഈ വിഷയത്തില് വേണ്ടത്ര ശ്രദ്ധകൊടുക്കുന്നില്ല എന്നതാണ് സത്യം.
മാലിന്യ സംസ്കരണ കേന്ദ്രങ്ങളുടെ അഭാവമാണ് പത്തനംതിട്ട ജില്ലയിലെ ഗ്രാമപഞ്ചായത്തും നഗരസഭകളും നേരിടുന്ന പ്രധാന വെല്ലുവിളി. പലയിടത്തും ഇന്സിനെറ്റര് സംവിധാനവുമില്ല. സംവിധാനം ഉള്ളയിടത്ത് ഇത് പ്രവര്ത്തിക്കുന്നുമില്ല. പഞ്ചായത്തുകളിലെ വാര്ഡുകള് കേന്ദ്രീകരിച്ച് മഴക്കാലപൂര്വ്വ ശുചീരണ പ്രവര്ത്തികള് ശക്തമാക്കുമ്പോള് ബന്ധപ്പെട്ട ഗ്രാമപഞ്ചായത്ത് ഭരണ സമിതികള് ഈ വിഷയത്തില് കൂടുതല് ശ്രദ്ധ കൊടുക്കേണ്ടതുണ്ട്.
