പത്തനംതിട്ട: പരുമല ആശുപത്രിയിലെ എയര് എമ്പോളിസം വധശ്രമ കേസില് പ്രതിയായ അനുഷയുടെ ജാമ്യാപേക്ഷ കോടതി തളളി. തിരുവല്ല കോടതി പ്രതിയെ രണ്ടു ദിവസത്തേക്ക് പോലീസ് കസ്റ്റഡിയില് വിട്ടു. വധശ്രമകേസിലെ ഗൂഢാലോചന ഉള്പ്പടെ പോലീസ് അന്വേഷിക്കും. വിചിത്രമായ കൊലപാതക രീതി ആസൂത്രണം ചെയ്തതില് ആരുടെയെങ്കിലും സഹായം കിട്ടിയോ എന്നാണ് പ്രധാനമായും അന്വേഷിക്കുന്നത്. അനുഷയെ കസ്റ്റഡിയില് കിട്ടിയതിനാല് പരുമല ആശുപത്രിയില് എത്തിച്ചു വീണ്ടും തെളിവെടുക്കും. വേണ്ടിവന്നാല് ആക്രമണത്തിന് ഇരയായ സ്നേഹയുടെ ഭര്ത്താവ് അരുണിനൊപ്പം ഇരുത്തി ചോദ്യം ചെയ്യാനും പോലീസ് ആലോചനയുണ്ട്.
വാട്സ്ആപ്പ് ചാറ്റുകള് വീണ്ടെടുക്കുന്നതാണ് കേസില് നിര്ണായകമാണ്. ഇതിനുള്ള നടപടികളും പോലീസ് തുടങ്ങി. ഡിലീറ്റ് ചെയ്ത ചാറ്റുകള് സംബന്ധിച്ച് അനുഷ കൃത്യമായ മറുപടി പോലീസിന് നല്കിയിട്ടില്ല. അനുഷയുടെ ആദ്യ ഭര്ത്താവിന്റെയും രണ്ടാം ഭര്ത്താവിന്റെയും മൊഴിയും പോലീസ് രേഖപ്പെടുത്തും. ആക്രമണത്തിനിരയായ യുവതിയുടെ ഭര്ത്താവിനെ പോലീസ് കഴിഞ്ഞ ദിവസം വീണ്ടും ചോദ്യം ചെയ്തിരുന്നു. രണ്ടാം തവണയാണ് അരുണിനെ പോലീസ് വിളിച്ചുവരുത്തിയത്.
