ന്യൂഡല്ഹി : രാഹുല് ഗാന്ധി ചിത്രം പങ്കുവെച്ചതിലും ട്വീറ്റ് ചെയ്തതിലും പരാതിയില്ലെന്ന് ഡല്ഹിയില് പീഡനത്തിനിരയായി കൊല്ലപ്പെട്ട ഒന്പത് വയസുകാരിയുടെ അമ്മ. പെണ്കുട്ടിയുടെ കുടുംബത്തെ സന്ദര്ശിച്ചതിന് ശേഷം ആഗസ്റ്റ് നാലിനാണ് രാഹുല് ഗാന്ധിയുടെ ട്വീറ്റും കൊല്ലപ്പെട്ട ബാലികയുടെ ചിത്രവും ട്വിറ്ററിൽ വന്നത്.
കുട്ടിയുടെ രക്ഷിതാക്കളുടെ ചിത്രവും ഇതിനൊപ്പം രാഹുൽ പങ്കുവെച്ചിരുന്നു. ഇതിന് പിന്നാലെ വ്യാപകമായി വിമര്ശനങ്ങള് ഉയരുകയും, ബാലാവകാശ കമ്മീഷന്റെ നോട്ടീസിനെ തുടര്ന്ന് ട്വിറ്റര് രാഹുല് ഗാന്ധിയുടെ അക്കൗണ്ട് ലോക്ക് ചെയ്തിരുന്നു. അതേസമയം ട്വിറ്ററിന്റെ ഈ നീക്കത്തെ വിമർശിച്ച് രാഹുൽ ഗാന്ധിയും രംഗത്ത് വന്നിരുന്നു. രക്ഷിതാക്കളുടെ കണ്ണീര്, ഇന്ത്യയുടെ മകള്ക്ക് നീതി വേണമെന്ന് മാത്രമാണ് പറയുന്നതെന്നായിരുന്നു രാഹുലിന്റെ ട്വീറ്റ്.